અંબિકા,ખાપરી, દમણગંગા,કીમ, તાપી બે કાંઠે થઈ ગઈ મધર ઈન્ડિયા,મઘુબન, ડોસવાડાના ડેમ ઓવરફ્લો થયા
અમદાવાદ, તા.૨
દક્ષિણ ગુજરાતમાં વરસી રહેલા ભારે વરસાદના કારણે સ્થાનિક નદીઓ બે કાંઠે વહી રહી છે. વરસાદી અને નવા નીરની આવક થતાં જળસંચય અને સિંચાઈ માટે બનાવાયેલા દક્ષિણ ગુજરાતના મોટાભાગના ડેમ ઓવર ફ્લો થઈ ગયા છે. તાપી નદી પર બનાવાયેલા ઉકાઈની સપાટીમાં પણ ક્રમશઃવધારો થઈ રહ્યો છે. ઉકાઈ ડેમ ૩૦૦ની સપાટી વટાવીને ૩૦૩ની સપાટીએ પહોંચી ગયો છે. જા કે, ઉકાઈનું રૂલ લેવલ હજુ દૂર છે. ડેમ અને જળાશયો ઓવરફ્લો થઈ જતાં ધરતીપુત્રોમાં આનંદની લાગણી જોવા મળી રહી છે. સ્થાનિક અંબીકા,ખાપરી, દમણગંગા,કીમ, તાપી નદી બે કાંઠે વહેતી થઇ છે તો, મધર ઈન્ડિયા, કાકરાપાર, મઘુબન, જૂજ, ડોસવાડા સહિતના ડેમ ઓવરફ્લો થઇ ગયા છે. સુરતના માંગરોળ સહિતના પંથકોમાં આજે પાંચ ઇંચ સુધીનો અતિ ભારે વરસાદ નોંધાયો હતો. વલસાડની દમણગંગા નદી પર આવેલો મધુબન ડેમ ઓવરફ્લો થઈ ગયો છે. ઉપવાસ અને વલસાડમાં પડી રહેલા વરસાદના પગલે મધુબન ડેમના ૭ દરવાજા ૩ મીટર સુધી ખોલવામાં આવ્યાં છે. ડેમમાં પાણીની આવક ૯૯,૫૧૮ ક્યુસેક અને દરવાજા ખોલીને ૮૪,૦૯૭ ક્યૂસેકની જાવક કરવામાં આવી રહી છે. હાલ ડેમની સપાટી ૭૩.૩૫ મીટર પહોંચી ગઈ છે. વાંસદામાંથી વહેતી ખરેરા નદી પરનો કેલીયા ડેમ ઓવર ફ્લો થઈ ગયો છે. ખરેરા નદી અને ઉપરવાસમાં પડી રહેલા ભારે વરસાદના કારણે ડેમ ઓવરફ્લો છેલ્લા ચારેક દિવસથી થઈ ગયો છે. ડેમ ઓવરફ્લો થતાં નીચાણવાળા વિસ્તારના લોકોને સાવચેત કરાયા છે. સોનગઢમાં આવેલો ડોસવાડા ડેમ ઓવરફ્લો થઈ ગયો છે. સાથે જ મધર ઈન્ડિયા ડેમ ત્રણ દિવસ અગાઉ ઓવરફ્લો થઈ ગયો છે. તાપી નદી પર આવેલો કાકરાપાર ડેમ પણ ઓવરફ્લો થઈ ગયો છે. નવસારીનો જૂજ ડેમ પણ ઓવરફ્લો થયો છે. જેથી ખેડૂતોને સિંચાઈ માટે ઉપયોગમાં પાણી આપી શકાય તેમ જ લોકોના પીવાના પાણીની સમસ્યા દૂર થઈ ગઈ છે. દક્ષિણ ગુજરાતમાં સતત વરસી રહેલા વરસાદના પગલે ઔરંગા-ભૈરવી નદી ૨.૮૦મીટર, ઔરંગા-અબ્રામા ૪.૮૮મીટર, પાર ૨.૫૦ મીટર, તાન ૧.૨૦ મીટર, માન ૧.૦૦મીટરના લેવલ પર વહી રહી છે. નદીઓના જળસ્તરમાં વધારો થતાં જ આસપાસના વિસ્તારોને સતર્ક રહેવા માટે સૂચનાઓ આપી દેવામાં આવી છે.ચોમાસુ શરૂ થયું ત્યારથી વરસાદે થોડુ ખેંચાવ્યું હતું. જૂન મહિનાની કસર જુલાઈ મહિનાએ મેઘરાજાએ જાણે પૂરી કરી દીધી છે. વલસાડમાં સિઝનનો હાલ ૬૧ ઈંચ વરસાદ નોંધાયો છે. સુરત જિલ્લાની વાત કરીએ તો ૩૧.૬૮ ઈંચ વરસાદ નોંધાયો છે. તાપી જિલ્લામાં સરેરાશ વરસાદ ૩૬ ઈંચ જેટલો નોંધાયો છે. વરસાદના ઘર મનાતા ડાંગમાં સિઝનનો અત્યાર સુધીનો ૫૦ ઈંચ જેટલો વરસાદ નોંધાયો છે. નવસારીમાં એકંદરે ૪૩ ઈંચ વરસાદ નોંધાયો છે. આમ દક્ષિણ ગુજરાતમા બહુ સારી મેઘમહેર થઇ છે. મોટાભાગના ડેમ ઓવરફ્લો થતા રાહત થઈ છે.