આગામી 14 જાન્યુઆરીના ઉત્તરાયણ પર્વને લઈ આકાશમાં પતંગો ચગવાની શરૂઆત થઈ ગઈ છે. પરંતુ ઉત્તરાયણ દરમિયાન પતંગની દોરીથી ગળું કપાવાના અનેક ગંભીર બનાવો સામે આવતા હોય છે. આવા અકસ્માતોને અટકાવવા માટે રાજપીપળાના એક પેટ્રોલ પંપ દ્વારા અનોખી અને સરાહનીય પહેલ હાથ ધરવામાં આવી છે.આ પેટ્રોલ પંપ પર આવતા બાઈક અને સ્કૂટર ચાલકોને પતંગની દોરીથી બચાવવા માટે સેફટી ગાર્ડ (જાડા તારની એંગલ) કોઈપણ ચાર્જ લીધા વગર મફતમાં લગાવી આપવામાં આવી રહ્યા છે. આ સાથે RTO વિભાગ દ્વારા વાહન ચાલકોને માર્ગ સલામતી અંગે સમજણ આપવામાં આવી હતી તેમજ માર્ગ સલામતીના પેમ્પ્લેટનું વિતરણ પણ કરવામાં આવ્યું હતું.ઉલ્લેખનીય છે કે, દર વર્ષે ઉત્તરાયણ દરમિયાન પતંગની દોરીથી ગળું કપાવાના બનાવો વધે છે. આવી સ્થિતિમાં આ સેપ્ટિગાર્ડ વાહન ચાલકો માટે અસરકારક રક્ષણ પૂરું પાડે છે. સેફટી ગાર્ડ લગાવનારોએ જણાવ્યું હતું કે, તેમણે જાતે તેનો ઉપયોગ કરી તેની અસરકારકતા અનુભવેલી છે.બજારમાં આ પ્રકારનો સેપ્ટિગાર્ડ 100 થી 150 રૂપિયામાં ફિટ થાય છે, પરંતુ ઘણા લોકો ખર્ચ ન કરવા કારણે તેને લગાવતા નથી, જે જીવ માટે જોખમરૂપ બની શકે છે. આ જ કારણથી પેટ્રોલ પંપ દ્વારા “જીવ બચાવ એ જ મુખ્ય ઉદ્દેશ” સાથે મફત સેવા શરૂ કરવામાં આવી છે.