હરિયાણાના કરનાલમાં એક કાર્યક્રમ દરમિયાન બોલિવૂડ એક્ટ્રેસ મૌની રોય સાથે થયેલી છેડતીની ઘટનાએ ભારે ચકચાર જગાવી છે. મૌની રોયે સોશિયલ મીડિયા પર પોતાની વ્યથા ઠાલવતા જણાવ્યું કે, આ ઇવેન્ટ દરમિયાન કેટલાક લોકોનું વર્તન અત્યંત શરમજનક અને અસહ્ય હતું. ખાસ કરીને દાદાની ઉંમરના બે વડીલોના વર્તનથી તે ભારે આઘાતમાં છે. આ ઘટના અને જણાવતા મૌનીએ કહ્યું કે, ‘કાર્યક્રમ દરમિયાન જ્યારે હું સ્ટેજ તરફ જઈ રહી હતી ત્યારે કેટલાક પુરુષો ફોટો પડાવવાના બહાને મારી પાસે આવ્યા અને વૃદ્ધે મારી કમર પકડી, જેનો મેં વિરોધ કરતા કહ્યું કે, ‘સર, તમારો હાથ હટાવો’, ત્યારે પેલા વડીલોને તે ગમ્યું નહીં.મૌની રોયે પોતાની પોસ્ટમાં ચોંકાવનારો ખુલાસો કર્યો કે, સ્ટેજ પર પરફોર્મન્સ દરમિયાન પણ પરિસ્થિતિ ગંભીર હતી. બે વ્યક્તિઓ સ્ટેજની બિલકુલ સામે ઊભા રહીને તેને અશ્લીલ ઈશારા કરી રહ્યા હતા અને અભદ્ર ટિપ્પણીઓ સાથે ગાળો બોલી રહ્યા હતા. જ્યારે મેં તેમને નમ્રતાથી રોકવાનો પ્રયાસ કર્યો, ત્યારે તેમણે મારા પર ગુલાબના ફૂલ ફેંકવાનું શરૂ કરી દીધું હતું. આ ગેરવર્તણૂકથી કંટાળી હું એક સમયે સ્ટેજ છોડીને જતી રહી હતી, પરંતુ પ્રોફેશનલિઝમ જાળવવા હું પરત આવી અને મારું પરફોર્મન્સ પૂરું કર્યું હતું.મૌની રોયે પોતાની આપવીતી જણાવતા ગંભીર આક્ષેપ કર્યો કે, સ્ટેજ ઊંચાઈ પર હોવાનો અયોગ્ય ફાયદો ઉઠાવીને કેટલાક લોકો નીચે ઊભા રહીને અત્યંત ખોટા અને અશ્લીલ એન્ગલથી તેના વીડિયો શૂટ કરી રહ્યા હતા. જ્યારે આ શરમજનક હરકત રોકવા માટે તેમને ટોકવામાં આવ્યા, ત્યારે તે શખ્સો સુધરવાને બદલે ઉલટાનું ગાળાગાળી કરવા લાગ્યા હતા. જાહેરમાં આટલી હદ સુધીની અભદ્ર વર્તન થઈ રહ્યું હોવા છતાં ત્યાં હાજર રહેલા આયોજકો કે સુરક્ષાકર્મીઓએ કોઈ પગલાં ન લીધા.