રાજપીપલા,તા 23
નર્મદા જિલ્લામાં આજે થયેલા ભારે વરસાદના કારણે અનેક નીચાણવાળા વિસ્તારોમાં પાણી ભરાવાની પરિસ્થિતિ સર્જાઈ છે. ઉપરાંત હવામાન વિભાગ દ્વારા આવતીકાલે પણ ભારે વરસાદની આગાહી સાથે એલર્ટ જાહેર કરવામાં આવ્યું છે. આ પરિસ્થિતિને ધ્યાનમાં રાખી વિદ્યાર્થીઓની સલામતી અને સુરક્ષાને સર્વોચ્ચ પ્રાથમિકતા આપતાં જિલ્લા વહીવટીતંત્ર દ્વારા સાવચેતીના ભાગરૂપે તા. 24 જુલાઈ, 2026 (શુક્રવાર)ના રોજ નર્મદા જિલ્લાના તમામ આંગણવાડી કેન્દ્રો, સરકારી તથા ખાનગી પ્રાથમિક, માધ્યમિક અને ઉચ્ચતર માધ્યમિક શાળાઓ, કોલેજો તેમજ ITI સંસ્થાઓમાં રજા જાહેર કરવામાં આવે છે. જો કે, શૈક્ષણિક કાર્યમાં સતતતા જળવાઈ રહે તે માટે સંબંધિત શૈક્ષણિક સંસ્થાઓ ઓનલાઈન શિક્ષણકાર્ય ચાલુ રાખી શકશે.
જિલ્લા વહીવટીતંત્ર દ્વારા નાગરિકોને પણ અનિવાર્ય કારણ સિવાય બહાર ન નીકળવા, નદી-નાળા અને પાણી ભરાયેલા વિસ્તારોમાં અવરજવર ટાળવા તેમજ વહીવટીતંત્ર દ્વારા સમયાંતરે આપવામાં આવતી સૂચનાઓનું પાલન કરવા અનુરોધ કરવામાં આવે છે.