અમદાવાદ:
કાર્તિક આર્યન અને કૃતિ સેનનના સંબંધોમાં તેમની ફિલ્મ ‘લુકા છુપી’ની સક્સેસ બાદ તણાવ હોવાનું કહેવામાં આવ્યું હતું. વાસ્તવમાં આ ફિલ્મની સક્સેસની તમામ ક્રેડિટ કાર્તિકને મળી હોવાથી કૃતિ નારાજ હોવાનું કહેવામાં આવ્યું હતું. જોકે, આ વાતમાં કોઈ સચ્ચાઈ નથી અને બંને એક્ટર્સે ખૂબ જ મજેદાર રીતે સોશિયલ મીડિયા પર સ્પષ્ટતા કરી હતી.
કાર્તિકે ટ્વિટર પર આ ફિલ્મના સેટ્સ પરથી તેનો અને કૃતિ સેનનનો એક ફોટોગ્રાફ શૅર કર્યો હતો. જેમાં તેઓ બંને તેમના ફોન્સ પર બિઝી હોય એમ જણાય છે. કાર્તિકે એ ફોટોગ્રાફની સાથે કેપ્શન લખી હતી કે, ‘અજી સુનતી હો!!! ગુડ્ડુ અને રશ્મિના પ્રેમના ન્યૂઝ છાપવાના બદલે, આ કેવા ન્યૂઝ અખબારમાં આવ્યા છે. હજી તો આપણા મેરેજને માત્ર ‘50 દિવસ’ જ થયા છે, અને લોકો અફવાઓ ફેલાવવા લાગ્યા.’
કૃતિએ આ પોસ્ટનો જવાબ આપ્યો હતો કે, ‘હાહાહા!! આપણી ‘દુનિયા’ પર ખૂબ જ નજર રાખવામાં આવી રહી છે. એનીવે, 50 દિવસની આપણી એનિવર્સરી સેલિબ્રેટ કરવા માટે તું મને ક્યારે લઈ જઇશ?’ જેનો કાર્તિકે તરત જ જવાબ આપ્યો હતો કે, ‘અરે ગુડ્ડુ તો એટલો ઉતાવળો છે કે, હમણાં જ તમને લઈ જઈ જાય અને પાર્ટી કરી લે. સહપરિવાર ધૂમધામથી સેલિબ્રેટ કરીશું.’