ગોદરેજ ઇન્ડસ્ટ્રીઝ ગ્રૂપે આજે નવો ઉદ્દેશ્ય અને બ્રાન્ડ ઓળખની જાહેરાત કરી હતી, જે ગ્રૂપના વિકાસના આગામી તબક્કા માટે તેની ઓળખ, વ્યૂહરચના અને મહત્વાકાંક્ષાને સુસંગત બનાવતી તેની ઉત્ક્રાંતિમાં એક મહત્વપૂર્ણ ક્ષણ છે. 129 વર્ષની મજબૂત પરંપરા અને નવા સ્વરૂપમાં કાર્યરત માત્ર બે વર્ષના અનુભવ સાથે, આ નવો ઉદ્દેશ્ય અને ઓળખ ગ્રૂપના ભૂતકાળ અને ભવિષ્ય બંનેને સ્પષ્ટ રીતે રજૂ કરે છે. આ બદલાવથી કન્ઝ્યુમર પ્રોડક્ટ્સ, રિયલ એસ્ટેટ, નાણાંકીય સેવાઓ, કૃષિ અને કેમિકલ્સ જેવા વિવિધ ક્ષેત્રોમાં કાર્યરત તેના વ્યવસાયોમાં વધુ સ્પષ્ટતા અને સંકલન આવશે. આ જાહેરાત મુંબઈમાં સ્થિત ગ્રુપના હેડક્વાર્ટર્સ ‘ગોદરેજ વન’ ખાતે યોજાયેલા મીડિયા કાર્યક્રમમાં કરવામાં આવી હતી.
આ બદલાવનું મુખ્ય કેન્દ્ર છે ગ્રૂપનો નવો ઉદ્દેશ્ય: “Crafting tomorrow since 1897.” આ ગ્રૂપનો વારસો અને નવીનતાને જવાબદારી સાથે જોડીને સ્થાયી મૂલ્ય સર્જે તેવા વ્યવસાયો ઊભા કરવાની તેની મહત્વાકાંક્ષાએ બંનેને દર્શાવે છે. આ વિચાર ગોદરેજ ગ્રૂપના સ્થાપક અર્દેશિર ગોદરેજના જીવનથી પ્રેરિત છે, જેમણે હંમેશા નવીનતા અને મૂલ્યોને સાથે રાખ્યા હતા. ગ્રૂપે તેના ત્રણ મુખ્ય મૂલ્યો – વિશ્વાસ જગાવવો (Inspire Trust), ખુશીઓ આપવી (Create Delight), અને હિંમતપૂર્વક આગળ વધવું (Be Bold) – ને ફરીથી મજબૂત બનાવ્યા છે, જે સંસ્થામાં નેતૃત્વ અને નિર્ણયો લેવાની પ્રક્રિયામાં સતત માર્ગદર્શન આપશે.
ગોદરેજ ઇન્ડસ્ટ્રીઝ ગ્રૂપના ચેરપર્સન ડેઝિગ્નેટ પિરોજશા ગોદરેજે જણાવ્યું હતું કે, “Crafting tomorrow since 1897 એ અમારી આ માન્યતાનું પ્રતિબિંબ છે કે મૂલ્યો અને પરિણામો એકસાથે આગળ વધવા જોઈએ. જેમ જેમ અમે વિકાસ કરીએ છીએ, તેમ આ ફિલોસોફી અમને એવા વ્યવસાયો ઊભા કરવામાં માર્ગદર્શન આપતી રહેશે, જે સફળ હોવા સાથે જવાબદાર પણ હોય.”
ગ્રૂપે છેલ્લા પાંચ વર્ષમાં વેચાણ અને ચોખ્ખા નફામાં 20 ટકાથી વધુના સીએજીઆર સાથે મજબૂત વૃદ્ધિ દર્શાવી છે. આગામી તબક્કા માટે, ગ્રૂપે સ્પષ્ટ લક્ષ્યો નક્કી કર્યા છે, જેમાં દર વર્ષે 15 ટકાથી વધુ વેચાણ વૃદ્ધિ અને 20 ટકાથી વધુ ઇપીએસ વૃદ્ધિનો સમાવેશ થાય છે. સાથે જ, દરેક વ્યવસાય સ્થિર સ્થિતિમાં 18 ટકાથી વધુ ઇક્વિટી પર વળતર મેળવશે તેવી અપેક્ષા રાખવામાં આવી છે. ગ્રૂપ હાલમાં ત્રણ જાહેર લિસ્ટેડ પ્લેટફોર્મ (કન્ઝ્યુમર પ્રોડક્ટ્સ, પ્રોપર્ટીઝ અને એગ્રોવેટ)માંથી પાંચ સુધી વિસ્તરણ કરવાની યોજના ધરાવે છે. આ તમામ પગલાંના પરિણામે આગામી પાંચ વર્ષમાં સંયુક્ત માર્કેટ કેપિટલાઇઝેશન રૂ. 5,00,000 કરોડ સુધી પહોંચવાની અપેક્ષા છે.
ગ્રૂપની વૃદ્ધિ વ્યૂહરચના તેના લાંબા સમયથી ચાલતા વિશ્વાસ પર આધારિત છે કે મજબૂત આર્થિક પ્રદર્શન સાથે સમાજ અને પર્યાવરણ માટે સકારાત્મક પરિણામો પણ જરૂરી છે. 2025માં, ગોદરેજ કન્ઝ્યુમર પ્રોડક્ટ્સ અને ગોદરેજ પ્રોપર્ટીઝ બંનેને તેમના ક્ષેત્રોમાં ડાઉ જોન્સ બેસ્ટ-ઇન-ક્લાસ સસ્ટેનેબિલિટી ઇન્ડાઇસિસમાં વૈશ્વિક સ્તરે પ્રથમ સ્થાન મળ્યું હતું. આ મજબૂત આધાર પર આગળ વધતાં, ગ્રૂપે 2035 સુધી નેટ-ઝીરો ઓપરેશન્સ (Scope 1 અને 2) અને 2047 સુધી પ્લેનેટ-પોઝિટિવ સપ્લાય ચેઇન જેવા લક્ષ્યો નક્કી કર્યા છે. આગામી પાંચ વર્ષમાં ગ્રૂપમાં મહિલાઓ, LGBTQ+ સમુદાય અને દિવ્યાંગ લોકોનું 40 ટકા પ્રતિનિધિત્વ મેળવવાનું લક્ષ્ય પણ નક્કી કરવામાં આવ્યું છે, જે ગોદરેજ પ્રોપર્ટીઝ અને ગ્રૂપના કોર્પોરેટ સેન્ટરમાં પહેલેથી જ પ્રાપ્ત થઈ ચૂક્યું છે. ઉપરાંત, 2025માં ગોદરેજ ફાઉન્ડેશન, જે ગોદરેજ ઇન્ડસ્ટ્રીઝ ગ્રૂપમાં 15 ટકા હિસ્સેદારી ધરાવે છે, દ્વારા એક નાણાંકીય ફંડ તૈયાર કરવામાં આવ્યું છે, જેનાથી તેની વાર્ષિક પરોપકારી ખર્ચમાં અગાઉની સરખામણીએ પાંચ ગણો વધારો શક્ય બનશે.
નવી ઉદ્દેશ્ય સાથે, ગ્રૂપે તેની નવી બ્રાન્ડ ઓળખ પણ રજૂ કરી છે, જે DISCO નામની ગ્રૂપની આંતરિક ડિઝાઇન ટીમ દ્વારા તૈયાર કરવામાં આવી છે. આ બ્રાન્ડ ઓળખ વધુ એકીકૃત અને ભવિષ્યમુખી કોર્પોરેટ બ્રાન્ડ સિસ્ટમ ઉભી કરવા માટે રચવામાં આવી છે, જેમાં નવી વિઝ્યુઅલ લેંગવેજ, ખાસ તૈયાર કરાયેલ ટાઇપોગ્રાફી (GI Sans), અનન્ય સોનિક આઇડેન્ટિટી અને ખાસ સુગંધનો સમાવેશ થાય છે, જે ડિજિટલ, ફિઝિકલ અને અનુભવ આધારિત તમામ ટચપોઇન્ટ્સ પર એકરૂપતા અને સંકલિત અનુભવ પ્રદાન કરે છે.
ગોદરેજ ઇન્ડસ્ટ્રીઝના એક્ઝિક્યુટિવ ડિરેક્ટર અને ચીફ બ્રાન્ડ ઓફિસર તાન્યા દુબાષે જણાવ્યું હતું કે, “આ નવી બ્રાન્ડ ઓળખ આપણું વર્તમાન સ્વરૂપ અને ભવિષ્યની દિશા બંનેનું પ્રતિબિંબ પાડે છે. તે ગોદરેજ બ્રાન્ડની મજબૂતીને વધુ મજબૂત બનાવે છે અને આવનારા સમય માટે અમારી મહત્ત્વાકાંક્ષાઓને વધુ આધુનિક અને એકીકૃત રીતે રજૂ કરે છે. આ દરેક વ્યવસાયને એક સામાન્ય ઉદ્દેશ્ય સાથે વધુ અસરકારક રીતે જોડાવા માટે સક્ષમ બનાવે છે, સાથે જ તેમની વિશિષ્ટ ભૂમિકાને જાળવી રાખે છે.”