પશ્ચિમ રેલવેના અમદાવાદ મંડળમાં મંગળવાર, 17 નવેમ્બર, 2026ના રોજ ભગવાન બિરસા મુંડાની જન્મજયંતિ નિમિત્તે જનજાતીય ગૌરવ દિવસની ઉજવણી કરવામાં આવી હતી. આ પ્રસંગે મંડળ રેલ પ્રબંધક શ્રી વેદ પ્રકાશની અધ્યક્ષતામાં મંડળ રેલ પ્રબંધક કાર્યાલય ખાતે કાર્યક્રમનું આયોજન કરવામાં આવ્યું હતું. કાર્યક્રમની શરૂઆત દીપ પ્રાગટ્ય અને ભગવાન બિરસા મુંડાના ચિત્ર પર પુષ્પમાળા અર્પણ કરીને કરવામાં આવી હતી.

કાર્યક્રમને સંબોધિત કરતાં મંડળ રેલ પ્રબંધક શ્રી વેદ પ્રકાશે ભગવાન બિરસા મુંડાના પ્રેરણાદાયી જીવન, તેમના અદમ્ય સાહસ, સંઘર્ષ, ત્યાગ અને બલિદાન તેમજ જનજાતીય સમાજના સામાજિક, સાંસ્કૃતિક અને રાજકીય ઉત્થાન માટે આપેલા અમૂલ્ય યોગદાન પર પ્રકાશ પાડ્યો હતો. તેમણે જણાવ્યું હતું કે ભગવાન બિરસા મુંડાનું જીવન અન્યાય અને શોષણ સામેના સંઘર્ષ, સામાજિક જાગૃતિ, આત્મસન્માન અને જનજાતીય ઓળખના સંરક્ષણનું ઉત્તમ ઉદાહરણ છે. ‘ધરતી આબા’ તરીકે જાણીતા ભગવાન બિરસા મુંડાએ પોતાના ટૂંકા જીવનકાળમાં જનજાતીય સમાજને સંગઠિત કરીને તેમના અધિકારો અને સ્વાભિમાન માટે ઐતિહાસિક સંઘર્ષ કર્યો હતો. આ પ્રસંગે અમદાવાદ મંડળના તમામ શાખા અધિકારીઓ ઉપસ્થિત રહ્યા હતા.

મંડળ રેલ પ્રબંધકે ઉપસ્થિત અધિકારીઓ અને કર્મચારીઓને અપીલ કરી હતી કે તેઓ ભગવાન બિરસા મુંડાના આદર્શો, સંઘર્ષશીલ વ્યક્તિત્વ, રાષ્ટ્ર પ્રત્યેના સમર્પણ અને સમાજના ઉત્થાનની ભાવનામાંથી પ્રેરણા મેળવે તથા તેમના દ્વારા સ્થાપિત મૂલ્યોને પોતાના જીવન અને કાર્યશૈલીમાં આત્મસાત કરે. તેમણે જનજાતીય ગૌરવ દિવસના મહત્વ પર ભાર મૂકતાં જનજાતીય સમુદાયના ગૌરવશાળી ઇતિહાસ, સમૃદ્ધ સાંસ્કૃતિક વારસા અને રાષ્ટ્ર નિર્માણમાં તેમના મહત્વપૂર્ણ યોગદાન પ્રત્યે સન્માન તથા જાગૃતિ વધારવાની જરૂરિયાત પર પણ ભાર મૂક્યો હતો.
કાર્યક્રમના અંતે ભગવાન બિરસા મુંડાના આદર્શો, તેમના ત્યાગ અને બલિદાન તેમજ જનજાતીય સમાજ અને રાષ્ટ્ર પ્રત્યેના તેમના અવિસ્મરણીય યોગદાનને યાદ કરીને તેમને શ્રદ્ધાંજલિ અર્પણ કરવામાં આવી હતી.
