- * તહેવારોની સિઝનમાં અસરકારક ભીડ વ્યવસ્થાપન અને મુસાફરોને શ્રેષ્ઠ સુવિધાઓ પૂરી પાડવામાં અમદાવાદ મંડળ બન્યું ઉત્તમ ઉદાહરણ.
- * 1 થી 15 નવેમ્બર 2026 દરમિયાન 79 વિશેષ ટ્રેન ટ્રિપ્સનું સંચાલન કરવામાં આવ્યું, મુખ્ય ટ્રેનોમાં વધારાના કોચ લગાવી મુસાફરોને રાહત આપવામાં આવી.
- * અમદાવાદ સ્ટેશન પરથી 8.13 લાખ, સાબરમતી થી 3.42 લાખ તથા અસારવા થી 1.37 લાખ થી વધુ મુસાફરોએ રેલ મુસાફરી કરી.
- * DRM શ્રી વેદ પ્રકાશના માર્ગદર્શન હેઠળ 24×7 દેખરેખ, વિશેષ હોલ્ડિંગ એરિયા, CCTV મોનિટરિંગ તથા વ્યાપક સુરક્ષા વ્યવસ્થાઓ દ્વારા મુસાફરોની મુસાફરીને સુરક્ષિત અને સુવિધાજનક બનાવવામાં આવી.

દિવાળી અને છઠ મહાપર્વ નિમિત્તે મુસાફરોની ભારે અવરજવર વચ્ચે પશ્ચિમ રેલવેના અમદાવાદ મંડળ દ્વારા વિશેષ ટ્રેન સેવાઓ, અસરકારક ભીડ વ્યવસ્થાપન, વ્યાપક સુરક્ષા વ્યવસ્થા અને વધુ સારી મુસાફર સુવિધાઓ દ્વારા મોટી સંખ્યામાં મુસાફરોને સુરક્ષિત, સરળ અને વ્યવસ્થિત રેલ મુસાફરી પૂરી પાડવામાં આવી.
1 નવેમ્બર થી 15 નવેમ્બર 2026 દરમિયાન માત્ર 15 દિવસમાં અમદાવાદ મંડળમાંથી 21 લાખથી વધુ મુસાફરોએ રેલ મુસાફરી કરી હતી, જેના પરિણામે મંડળને ₹108 કરોડથી વધુની આવક પ્રાપ્ત થઈ હતી. આ સમયગાળા દરમિયાન મુસાફરોની વધારાની માંગને પહોંચી વળવા કુલ 79 વિશેષ ટ્રેન ટ્રિપ્સનું સંચાલન કરવામાં આવ્યું હતું. આ ઉપરાંત નિયમિત ટ્રેનોમાં વધારાના કોચ લગાવી વધુ મુસાફરોને મુસાફરીની સુવિધા પૂરી પાડવામાં આવી હતી.
મંડળ રેલવે પ્રબંધક (DRM) શ્રી વેદ પ્રકાશના માર્ગદર્શન હેઠળ વાણિજ્ય, પરિચાલન, સુરક્ષા, યાંત્રિક તથા અન્ય સંબંધિત વિભાગો વચ્ચે વધુ સારો સમન્વય સ્થાપિત કરીને મુસાફરોની સુવિધા, સુરક્ષા તેમજ ટ્રેનોના સરળ સંચાલન માટે વિશેષ વ્યવસ્થાઓ સુનિશ્ચિત કરવામાં આવી હતી.
અમદાવાદ, સાબરમતી અને અસારવા સ્ટેશનો પરથી મોટી સંખ્યામાં મુસાફરોની અવરજવર
તહેવારોના સમયગાળા દરમિયાન અમદાવાદ મંડળના મુખ્ય રેલવે સ્ટેશનો પર મુસાફરોની નોંધપાત્ર અવરજવર નોંધાઈ હતી.
- અમદાવાદ રેલવે સ્ટેશન: 8.13 લાખથી વધુ મુસાફરો
- સાબરમતી રેલવે સ્ટેશન: 3.42 લાખથી વધુ મુસાફરો
- અસારવા રેલવે સ્ટેશન: 1.37 લાખથી વધુ મુસાફરો
આ ઉપરાંત ભુજ, ગાંધીધામ તથા મંડળના અન્ય રેલવે સ્ટેશનો પરથી પણ મોટી સંખ્યામાં મુસાફરોએ વિવિધ રાજ્યોમાં આવેલા પોતાના ગંતવ્ય સ્થાનો માટે મુસાફરી કરી હતી.
દિવાળી અને છઠ મહાપર્વ દરમિયાન ખાસ કરીને ઉત્તર પ્રદેશ, બિહાર સહિત વિવિધ રાજ્યો તરફ જતાં મુસાફરોની વધતી સંખ્યાને ધ્યાનમાં રાખીને રેલવે પ્રશાસન દ્વારા ભીડ વ્યવસ્થાપન, વધારાની રેલ સેવાઓ અને મુસાફર સુવિધાઓ પર વિશેષ ધ્યાન આપવામાં આવ્યું હતું.
મુસાફરોની સુવિધા માટે 79 વિશેષ ટ્રેન ટ્રિપ્સનું સંચાલન
તહેવારોની સિઝનમાં મુસાફરોની વધારાની માંગને ધ્યાનમાં રાખીને પશ્ચિમ રેલવેના અમદાવાદ મંડળ દ્વારા 1 થી 15 નવેમ્બર 2026 દરમિયાન કુલ 79 વિશેષ ટ્રેન ટ્રિપ્સનું સંચાલન કરવામાં આવ્યું હતું. અમદાવાદ, સાબરમતી, અસારવા, ભુજ અને ગાંધીધામ જેવા મુખ્ય સ્ટેશનો પરથી ઉત્તર પ્રદેશ, બિહાર, રાજસ્થાન, મહારાષ્ટ્ર તથા અન્ય રાજ્યોનાં વિવિધ શહેરો માટે વિશેષ રેલ સેવાઓ ઉપલબ્ધ કરાવવામાં આવી હતી.આ વિશેષ સેવાઓમાં લખનૌ, કાનપુર, આગ્રા, મુંબઈ, પ્રયાગરાજ, મુઝફ્ફરપુર, દરભંગા, બરૌની, રાજગીર, જયપુર, હરિદ્વાર અને ભાગલપુર સહિતનાં અન્ય મુખ્ય ગંતવ્ય સ્થાનોનો સમાવેશ કરવામાં આવ્યો હતો.
આ ઉપરાંત મુસાફરોની વધતી માંગને ધ્યાનમાં રાખીને સ્વર્ણ જયંતિ રાજધાની એક્સપ્રેસ, તેજસ એક્સપ્રેસ અને કર્ણાવતી એક્સપ્રેસ જેવી મુખ્ય ટ્રેનોમાં વધારાના કોચ લગાવવામાં આવ્યા હતા, જેથી વધુ મુસાફરોને મુસાફરીની સુવિધા મળી શકે.
અસરકારક ભીડ વ્યવસ્થાપન માટે વિશેષ હોલ્ડિંગ એરિયાની વ્યવસ્થા
દિવાળી અને છઠ પૂજા દરમિયાન મુસાફરોની વધારાની ભીડને સુવ્યવસ્થિત રીતે સંભાળવા માટે અમદાવાદ અને સાબરમતી રેલવે સ્ટેશનો પર વિશેષ હોલ્ડિંગ એરિયા બનાવવામાં આવ્યા હતા.આ હોલ્ડિંગ એરિયામાં મુસાફરો માટે બેસવાની વ્યવસ્થા, પીવાનું પાણી, પૂરતી લાઇટિંગ અને પંખા જેવી આવશ્યક સુવિધાઓ ઉપલબ્ધ કરાવવામાં આવી હતી. સામાન્ય વર્ગના મુસાફરોની સુવિધા માટે ફૂડ પેકેટ, પાણીની બોટલો અને બિસ્કિટનું પણ વિતરણ કરવામાં આવ્યું હતું.

રેલવે પ્રશાસન દ્વારા સ્ટેશન પરિસરમાં મુસાફરોની અવરજવરને સુવ્યવસ્થિત રાખવા, પ્લેટફોર્મ પર બિનજરૂરી ભીડને નિયંત્રિત કરવા તથા મુસાફરોને સુરક્ષિત રીતે ટ્રેનોમાં બેસાડવા માટે વિશેષ વ્યવસ્થાઓ કરવામાં આવી હતી.આ સાથે જ પીવાના પાણીની સુવિધાઓની નિયમિત દેખરેખ તથા સ્ટેશન પરિસરમાં સ્વચ્છતા જાળવવા માટે પણ વિશેષ વ્યવસ્થાઓ સુનિશ્ચિત કરવામાં આવી હતી.
CCTV કેમેરા દ્વારા સતત દેખરેખ, સુરક્ષા માટે RPF જવાનોની વિશેષ તૈનાતી
તહેવારોના સમયગાળા દરમિયાન મુસાફરોની સુરક્ષા અને અસરકારક ભીડ વ્યવસ્થાપન સુનિશ્ચિત કરવા માટે રેલવે સુરક્ષા દળ (RPF), સરકારી રેલવે પોલીસ (GRP), ટિકિટ ચેકિંગ સ્ટાફ તથા અન્ય રેલવે કર્મચારીઓની વિશેષ તૈનાતી કરવામાં આવી હતી.અમદાવાદ અને સાબરમતી રેલવે સ્ટેશનો પર CCTV કેમેરા દ્વારા સ્ટેશન પરિસર, પ્લેટફોર્મ તથા મુસાફરોની અવરજવર પર સતત નજર રાખવામાં આવી હતી.
મુખ્ય સુરક્ષા વ્યવસ્થાઓ:
- સાબરમતી રેલવે સ્ટેશન પર 121 CCTV કેમેરા દ્વારા દેખરેખ.
- અમદાવાદ રેલવે સ્ટેશન પર 119 CCTV કેમેરા દ્વારા દેખરેખ.
- અમદાવાદ રેલવે સ્ટેશન પર ટૂંક સમયમાં વધુ 60 CCTV કેમેરા લગાવવાની યોજના.
- અમદાવાદ રેલવે સ્ટેશન પર 55 RPF જવાનોની તૈનાતી.
- સાબરમતી રેલવે સ્ટેશન પર 40 RPF જવાનોની તૈનાતી.
- અસારવા રેલવે સ્ટેશન પર 15 RPF જવાનોની તૈનાતી.
આ ઉપરાંત વાણિજ્ય વિભાગના કર્મચારીઓ, ખાસ કરીને ટિકિટ ચેકિંગ સ્ટાફ, મુસાફરોની મદદ અને વ્યવસ્થાઓને સરળતાથી જાળવી રાખવા માટે ચોવીસ કલાક તૈનાત રહ્યા હતા.
રેલવે પ્રશાસન દ્વારા સ્ટેશનનાં પ્રવેશ અને બહાર નીકળવાના દ્વાર, ફૂટ ઓવર બ્રિજ, પ્લેટફોર્મ તથા અન્ય મુખ્ય સ્થળોએ મુસાફરોની અવરજવર સુવ્યવસ્થિત રહે તે માટે વિશેષ ધ્યાન આપવામાં આવ્યું હતું.
મુસાફરો સુધી ટ્રેનો અને સુવિધાઓની માહિતી સમયસર પહોંચાડવામાં આવી
મુસાફરોને વિશેષ ટ્રેનોના સંચાલન, સમયપત્રક, પ્લેટફોર્મ તથા અન્ય આવશ્યક સુવિધાઓની માહિતી સમયસર ઉપલબ્ધ કરાવવા માટે ઇલેક્ટ્રોનિક ડિસ્પ્લે બોર્ડ, જાહેર ઉદ્ઘોષણા પ્રણાલી તથા સોશિયલ મીડિયાનો અસરકારક ઉપયોગ કરવામાં આવ્યો હતો.
રેલવે પ્રશાસન દ્વારા ટ્રેનોના સંચાલન અને સમયપાલનની નિયમિત દેખરેખ રાખવામાં આવી હતી, જેથી મુસાફરોને શક્ય તેટલો સરળ અને સુવિધાજનક મુસાફરીનો અનુભવ મળી શકે.
વિવિધ વિભાગો વચ્ચે વધુ સારા સમન્વયથી વ્યાપક મુસાફર વ્યવસ્થાઓ
મંડળ રેલવે પ્રબંધક શ્રી વેદ પ્રકાશના માર્ગદર્શન હેઠળ વિવિધ રેલવે વિભાગો વચ્ચે વધુ સારા સમન્વય દ્વારા વિશેષ ટ્રેનોનું સંચાલન, વધારાના કોચની વ્યવસ્થા, મુસાફરોની સુરક્ષા, સ્ટેશન વ્યવસ્થાપન, સ્વચ્છતા અને મુસાફર સુવિધાઓની સતત દેખરેખ સુનિશ્ચિત કરવામાં આવી હતી.તહેવારોની સિઝનમાં મોટી સંખ્યામાં મુસાફરોની અવરજવર હોવા છતાં રેલવે પ્રશાસન દ્વારા મુસાફરોને સુવ્યવસ્થિત રીતે તેમના ગંતવ્ય સ્થાને પહોંચાડવાના ઉદ્દેશથી ઉપલબ્ધ સંસાધનોનો અસરકારક ઉપયોગ કરવામાં આવ્યો હતો.

ખાસ કરીને અમદાવાદ, સાબરમતી અને અસારવા જેવા મુખ્ય સ્ટેશનો પર ભીડ વ્યવસ્થાપન તથા સુરક્ષા વ્યવસ્થાને પ્રાથમિકતા આપવામાં આવી હતી.
મુસાફરોની સુરક્ષા અને સુવિધા અમદાવાદ મંડળની સર્વોચ્ચ પ્રાથમિકતા
પશ્ચિમ રેલવેનું અમદાવાદ મંડળ મુસાફરોની સુરક્ષિત, સરળ અને સુવિધાજનક રેલ મુસાફરી સુનિશ્ચિત કરવા માટે સતત પ્રતિબદ્ધ છે.દિવાળી અને છઠ મહાપર્વ દરમિયાન માત્ર 15 દિવસમાં 21 લાખથી વધુ મુસાફરોની અવરજવર, 79 વિશેષ ટ્રેન ટ્રિપ્સનું સંચાલન તથા ₹108 કરોડથી વધુની આવક પ્રાપ્ત થવી એ મંડળની મુસાફર સેવા અને પરિચાલન પ્રવૃત્તિઓનું મહત્ત્વપૂર્ણ પરિણામ છે.અમદાવાદ મંડળ ભવિષ્યમાં પણ મુસાફરોની વધતી જરૂરિયાતોને અનુરૂપ રેલ સેવાઓના વિસ્તરણ, આધુનિક મુસાફર સુવિધાઓ, અસરકારક સુરક્ષા વ્યવસ્થા અને વધુ સારા ભીડ વ્યવસ્થાપનને પ્રાથમિકતા આપીને મુસાફર સેવાઓને વધુ મજબૂત બનાવવા માટે પ્રતિબદ્ધ છે.
