આજે ઈરાન યુદ્ધનો 26મો દિવસ છે. અમેરિકાએ ઈરાન સામેના હુમલાઓ પાંચ દિવસ માટે બંધ કરવાનો નિર્ણય લીધો છે. આ દરમિયાન, યુદ્ધ સમાપ્ત કરવા માટે તેહરાન અને વોશિંગ્ટન વચ્ચે પરોક્ષ વાટાઘાટો ચાલી રહી હોય તેવું લાગે છે.પાકિસ્તાન સહિત અન્ય માધ્યમો દ્વારા યુદ્ધ વિરામના પ્રયાસ યુએસ પ્રમુખ ડોનાલ્ડ ટ્રમ્પ તરફથી કરવામાં આવી રહ્યાં છે. ટ્રમ્પે ભારતના વડા પ્રધાન નરેન્દ્ર મોદી, પાકિસ્તાની વડા પ્રધાન શાહબાઝ શરીફ અને અન્ય ઘણા રાષ્ટ્રપ્રમુખો સાથે આ મુદ્દા પર ચર્ચા કરી હતી. શાહબાઝ શરીફે યુદ્ધ સમાપ્ત કરવા માટે બંને દેશો વચ્ચે મધ્યસ્થી કરવાની તૈયારી દર્શાવી છે. જોકે, ઈરાન અને ઈઝરાયલ બંને એકબીજા પર હુમલો કરવાનું બંધ કર્યુ નથી. ખાડી દેશો ડ્રોન અને મિસાઈલ હુમલાઓનો સામનો કરી રહ્યા છે. સોમવારે ટ્રમ્પની જાહેરાત પછી, ઈરાની વિદેશ પ્રધાન અબ્બાસ અરાઘચીએ ઇજિપ્ત, ઓમાન, પાકિસ્તાન, રશિયા, દક્ષિણ કોરિયા, અઝરબૈજાન, તુર્કી અને તુર્કમેનિસ્તાનમાં તેમના સમકક્ષો સાથે વાત કરી છે. ઇજિપ્તના વિદેશ મંત્રાલયે જણાવ્યું હતું કે, ઇજિપ્તના વિદેશ પ્રધાન બદ્ર અબ્દેલાતીએ પણ “સંભવિત વાટાઘાટો” અંગે યુએસ રાજદૂત સ્ટીવ વિટકોફ સાથે ફોન પર વાત કરી હતી. ટ્રમ્પે એક દિવસ પહેલા દાવો કર્યો હતો કે યુદ્ધ સમાપ્ત કરવા માટે છેલ્લા બે દિવસમાં ઈરાન સાથે “ખૂબ સારી વાટાઘાટો” થઈ છે. ઈરાની સંસદના સ્પીકર મોહમ્મદ બાઘર ગાલિબાફે અમેરિકન રાષ્ટ્રપતિના દાવાઓને ફગાવી દીધા, અને આવા અહેવાલોને તેલના ભાવને પ્રભાવિત કરવાના હેતુથી “નકલી સમાચાર” ગણાવ્યા. એવા પણ અહેવાલો છે કે ટ્રમ્પે પાકિસ્તાનના આર્મી ચીફ જનરલ આસિફ મુનીર સાથે ફોન પર વાત કરી હતી. જોકે, વ્હાઇટ હાઉસના પ્રેસ સેક્રેટરી કેરોલિન લેવિટે જણાવ્યું હતું કે, આ સંવેદનશીલ રાજદ્વારી ચર્ચાઓ હતી અને અમેરિકા સમાચાર માધ્યમો દ્વારા વાતચીત કરશે નહીં. આ ઘટનાક્રમ વચ્ચે, બે ભારતીય LPG કેરિયર્સ, જગ વસંત અને પાઈન ગેસ, 92,612.59 મેટ્રિક ટન LPG વહન કરતા, હોર્મુઝ સ્ટ્રેટમાંથી પસાર થયા છે અને 26 થી 28 માર્ચની વચ્ચે પહોંચવાની અપેક્ષા છે. ઈરાને મંગળવારે ભૂતપૂર્વ વડા, અલી લારીજાનીના હવાઈ હુમલામાં માર્યા ગયા બાદ, ભૂતપૂર્વ ઈરાની રિવોલ્યુશનરી ગાર્ડ કમાન્ડર મોહમ્મદ બાકર ઝાલગદરને દેશના સુપ્રીમ નેશનલ સિક્યુરિટી કાઉન્સિલના નવા સચિવ તરીકે નિયુક્ત કર્યા.અમેરિકાના રાષ્ટ્રપતિ ડોનાલ્ડ ટ્રમ્પે કહ્યું કે, ઈરાન ક્યારેય પરમાણુ શસ્ત્રો ન રાખવા સંમત થયું છે અને ઈરાની નેતૃત્વએ અમેરિકાને હોર્મુઝ સ્ટ્રેટ અને તેલ સંબંધિત ‘મહત્વપૂર્ણ ભેટ’ આપી છે. “તેઓ એક સોદો કરવા જઈ રહ્યા છે. તેમણે ગઈકાલે ખરેખર અદ્ભુત કંઈક કર્યું. તેમણે અમને એક ભેટ આપી જે આજે આવી. તે એક મોટી ભેટ હતી જે ખૂબ મૂલ્યવાન છે.” તેમણે ત્રણ અઠવાડિયાના યુદ્ધમાં વિજયની પણ ઘોષણા કરી. મંગળવારે ઓવલ ઓફિસમાં પત્રકારો સાથે વાત કરતા, ટ્રમ્પે દાવો કર્યો કે ઈરાન ‘સોદો’ કરવા આતુર છે અને સંકેત આપ્યો કે ઉપરાષ્ટ્રપતિ જે.ડી. વાન્સ, સેક્રેટરી ઓફ સ્ટેટ માર્કો રુબિયો, મધ્ય પૂર્વ બાબતોના ખાસ દૂત સ્ટીવ વિટકોફ અને જેરેડ કુશનર વાટાઘાટોનું નેતૃત્વ કરશે. હોમલેન્ડ સિક્યુરિટી વિભાગના નવા સચિવ તરીકે માર્કવેન મુલિનના શપથ ગ્રહણ સમારોહ પછી ટ્રમ્પે પત્રકારોને જણાવ્યું કે, “હું કંઈપણ પૂર્વાનુમાન કરવા માંગતો નથી, પરંતુ તેઓ (ઈરાન) સંમત થયા છે કે તેઓ ક્યારેય પરમાણુ શસ્ત્રો રાખશે નહીં,” ટ્રમ્પે કહ્યું.