અમદાવાદ : હવામાન વિભાગ દ્વારા ગુજરાતના મોટાભાગના જિલ્લાઓમાં હાલમાં ભારે વરસાદની આગાહી વ્યક્ત કરવામાં આવી છે ત્યારે ગઈકાલની જેમ આજે પણ સવારે 11:30 બાદ અમદાવાદ શહેરના પશ્ચિમ વિસ્તારમાં વરસાદી વાદળો છવાયાં હતાં અને 12 વાગતા સુધીમાં શહેરના રાણીપ, વાડજ, ઘાટલોડિયા, ચાંદલોડિયા ચાણક્યપુરી સહિતના વિસ્તારોમાં એકાએક ધોધમાર વરસાદ શરૂ થયો હતો. જો કે 10 મિનિટના ધોધમાર વરસાદ બાદ વરસાદ ધીમો થઈ ગયો હતો. જ્યારે પૂર્વ વિસ્તારમાં કાળાં ડિબાંગ વાદળો ઘેરાયાં હતાં અને પૂર્વમાં પણ ધોધમાર વરસાદ વરસી પડ્યો હતો. ભારે વરસાદ અને વરસાદી પાણીના કારણે શહેરના નરોડા પાટિયાથી કૃષ્ણનગર અને સૈજપુર તરફ ટ્રાફિકજામ થયો છે. સૈજપુર પાસે આવેલા ગરનાળામાં પણ પાણી ભરાઇ ગયું હતું.સવારે 11 વાગ્યા બાદ શહેરના પૂર્વ વિસ્તારમાં ધોધમાર વરસાદ શરૂ થયો હતો. નરોડા, કુબેરનગર, એરપોર્ટ, કોતરપુર, મેમ્કો, સૈજપુર સહિતના વિસ્તારોમાં 30 મિનિટમાં બે ઇંચ જેટલો વરસાદ પડ્યો હતો. બે ઇંચ વરસાદ પડતાની સાથે જ કુબેરનગર, નરોડા અને એરપોર્ટ રોડ પર પાણી ભરાયાં હતાં. વરસાદી પાણી ભરાવવાના કારણે નાગરિકોને ભારે હાલાકીનો સામનો કરવો પડ્યો હતો. પવન અને ગાજવીજ સાથે પશ્ચિમ વિસ્તારમાં નારણપુરા, અખબારનગર, ચાંદલોડિયા, રાણીપ, ન્યુ રાણીપ, શાહપુર, દુધેશ્વર, જમાલપુર, લાલ દરવાજા, ખાડિયા સહિતના વિસ્તારમાં અડધો ઇંચ જેટલો વરસાદ પડ્યો હતો.
પશ્ચિમ વિસ્તારમાં અનેક સ્થળોએ ધોધમાર વરસાદ :
હવામાન વિભાગે રાજ્યમાં ભારેથી અતિભારે વરસાદની આગાહી કરી છે. જેને પગલે આજે સતત બીજા દિવસે અમદાવાદમાં ધોધમાર વરસાદ પડ્યો છે. શહેરમાં ભરબપોરે 12 વાગ્યા બાદ આકાશમાં કાળાં ડિબાંગ વાદળો છવાયાં છે. શહેરના પશ્ચિમ વિસ્તારમાં અનેક સ્થળોએ ધોધમાર વરસાદ પડ્યો છે. વરસાદથી રસ્તાઓ પાણી પાણી થઈ ગયા છે.
પૂર્વ અમદાવાદમાં બજારમાં વરસાદી પાણી ભરાયાં :
અમદાવાદમાં 30 મિનિટમાં પૂર્વ વિસ્તારમાં કુબેરનગર અને નરોડા વિસ્તારમાં ધોધમાર વરસાદ પડ્યો હતો. કુબેરનગર વિસ્તારમાં આવેલા બજારમાં વરસાદી પાણી ભરાઇ ગયાં હતાં. ગટરના પાણી ઉભરાઇને બહાર આવ્યાં અને વરસાદી પાણી ભરાવવાના કારણે બજારમાં પાણી ભરાઇ ગયાં છે. સામાન્ય વરસાદમાં પણ પૂર્વ વિસ્તારમાં વરસાદી પાણી ભરાતાં કોર્પોરેશનના પ્રિ-મોન્સુન કામગીરી સામે સવાલ ઊભા થયા છે.