વેસ્ટમાંથી બેસ્ટ બનાવવાની જીટીયુના સ્ટાર્ટ અપકર્તાઓની સિધ્ધિ : 2.75 કિલોના 1 પેવર બ્લોક 15 ટન વજન સહન કરવાની ક્ષમતા ધરાવે છે.
આજના સમયમાં પ્લાસ્ટીકનો યોગ્ય નિકાલ થવો એ સમગ્ર વિશ્વ માટે મોટી સમસ્યા છે. આ પ્રકારના સ્ટાર્ટઅપ તેનું નિરાકરણ છે. જે કેન્દ્ર સરકારના સ્વચ્છ ભારત અભિયાનમાં પણ સહભાગી થાય છે : -પ્રો. ડૉ. નવીન શેઠ( કુલપતિ , જીટીયુ)
અમદાવાદ, તા.૩૧
ગુજરાત ટેકનોલોજીકલ યુનિવર્સિટીના સ્ટાર્ટઅપકર્તાઓની વધુ એક સિધ્ધિ સામે આવી છે, જેમાં તેમણે વેસ્ટમાંથી બેસ્ટ બનાવી બહુ મજબૂત, ટકાઉ અને ઉપયોગી પેવર બ્લોકનું નિર્માણ કર્યું છે, જેણે માત્ર શિક્ષણજગત જ નહી પરંતુ દેશના અન્ય સ્ટાર્ટઅપકર્તાઓમાં ભારે ચર્ચાનું કેન્દ્ર બન્યા છે. સૌ કોઇને આ નવી સિધ્ધિની નોંધ લેવી પડી છે. સમગ્ર વિશ્વમાં પ્લાસ્ટીકનું ઉત્પાદન અને તેના વપરાશમાં દિન-પ્રતિદિન વધારો થતો જોવા મળે છે. પરંતુ વપરાશ પછી તેનો યોગ્ય નિકાલ કરવો એ બહુ મોટી સમસ્યા જોવા મળી રહી છે. જે સમગ્ર માનવસૃષ્ટીના જીવનચક્ર માટે પણ એક મોટો પડકાર છે. પ્લાસ્ટીકનો યોગ્ય નિકાલ થાય તે હેતુસર , જીટીયુના સ્ટાર્ટઅપકર્તા કિશન પટેલ દ્વારા પ્લાસ્ટીક વેસ્ટ , ફ્લાય એસ અને સોલિડવેસ્ટનો ઉપયોગ કરીને પેવર બ્લોકનું નિર્માણ કરાયુ છે. આ સંદર્ભે જીટીયુના કુલપતિ પ્રો. ડૉ. નવીન શેઠે જણાવ્યું હતું કે, આજના સમયમાં પ્લાસ્ટીકનો યોગ્ય નિકાલ થવો એ સમગ્ર વિશ્વ માટે મોટી સમસ્યા છે. આ પ્રકારના સ્ટાર્ટઅપ તેનું નિરાકરણ છે. જે કેન્દ્ર સરકારના સ્વચ્છ ભારત અભિયાનમાં પણ સહભાગી થાય છે. જીટીયુના કુલસચિવ ડૉ. કે. એન. ખેરે પણ સ્ટાર્ટઅપકર્તાને સંશોધન બદલ અભિનંદન પાઠવ્યા હતાં.
તો બીજીબાજુ, આ સિધ્ધિ હાંસલ કરનાર આર્કોન કોમ્પોઝાઈટ્સ પ્રોડક્ટ સ્ટાર્ટઅપના કિશન પટેલે આ સંદર્ભે જણાવ્યું હતું કે, ફૂટપાથ અને જાહેર સ્થળો પર લગાવવામાં આવતાં પેવર બ્લોકની જરૂરીયાતને ધ્યાનમાં રાખતાં તેમજ આજના સમયમાં પ્લાસ્ટીકનો યોગ્ય નિકાલ થાય તે હેતુસર અમારા દ્વારા પ્લાસ્ટીક વેસ્ટ , ફ્લાય એસ અને સોલિડવેસ્ટનો ઉપયોગ કરીને પેવર બ્લોકનું નિર્માણ કર્યું. 2.75 કિલોના 1 પેવર બ્લોક 15 ટન વજન સહન કરવાની ક્ષમતા ધરાવે છે. શરૂઆતના ધોરણે રીસર્ચ કરવાના હેતુસર, અમદાવાદ મ્યુન્સિપલ કોર્પોરેશન જોડેથી પીરાણા ડમ્પ સાઈટનું 20000 કિલો પ્લાસ્ટીક ખરીદવામાં આવ્યું હતું . હાલના સમયે આણંદ નગરપાલિકા પાસેથી 7 રૂપિયા પ્રતિ કિલોના ભાવે પ્લાસ્ટીક વેસ્ટ ખરીદીને પેવર બ્લોક બનાવવામાં આવે છે. પ્લાસ્ટીક સહિત તેમાં ટોરેન્ટમાંથી નિકળતી ફ્લાય એસ અને મિકેનિકલ ઈન્ડસ્ટ્રીઝમાંથી સેન્ડ સ્વરૂપે નિકળતાં વેસ્ટનો પણ ઉપયોગ કરવામાં આવે છે. 1 પેવર બ્લોકમાં 25% પ્લાસ્ટીક , 60% સેન્ડ અને 15% અન્ય સોલિડ વેસ્ટનો ઉપયોગ કરવામાં આવે છે.
અન્ય પેવર બ્લોકની ક્ષમતાએ પ્લાસ્ટીક નિર્મિત પેવરબ્લોક 3 ગણી મજબૂતાઈ ધરાવે છે. તેમજ આર્થીક રીતે પણ 20 થી 25 રૂપિયાની કિંમતે 1 ચોરસફૂટના બ્લોકનું નિર્માણ કરી શકાય છે. જેમાં કોઈ પણ પ્રકારના પ્લાસ્ટીકનો ઉપયોગ કરી શકાય છે. સૌપ્રથમ પ્લાસ્ટીકનું વોશીંગ કરીને તેને ક્રશ કરવામાં આવે છે. ત્યારબાદ તેમાં અન્ય સોલિડ વેસ્ટનો ઉમેરો કરીને હિટ આપીને લિક્વિડ સેમી સોલિડ ફોર્મમાં રૂપાંતરીત કરાય છે. અંતે હાઈડ્રોલિક મશીન એક્સ્ટ્રુડરનો ઉપયોગ કરીને તેનો પેવર બ્લોકનો શેપ આપવામાં આવે છે. ભવિષ્યમાં અદ્યતન ટેક્નોલોજીનો ઉપયોગ કરીને આગ સામે પણ ટકી શકે તેવી ટાઈલ્સ , પ્લાસ્ટીકના ટોઈલેટ અને બેંચનું પણ નિર્માણ કરવામાં આવશે. જે પર્યાવરણમાંથી પ્લાસ્ટીકના નિકાલ માટે ઉત્તમ ઉદાહરણ પૂરું પાડશે.
