ઉત્તર-પશ્ચિમ દિલ્હીના મુખરજી નગર વિસ્તારમાં સ્થિત એક વન ક્ષેત્રમાંથી યુપીએસસીની તૈયારી કરી રહેલા વિદ્યાર્થીનો વૃક્ષ પર કોહવાયેલી હાલતમાં મૃતદેહ મળી આવ્યો છે. પોલીસે જણાવ્યા અનુસાર, રાજસ્થાનના દૌસામાં રહેતાં દીપક કુમાર મીણાનો મૃતદેહ 20 સપ્ટેમ્બરે એક કોચિંગ સંસ્થાની લાઈબ્રેરીની નજીક વન ક્ષેત્રમાંથી મળી આવ્યો છે.આ વિદ્યાર્થી ઘણા દિવસથી ગુમ હતો. એક પોલીસ અધિકારીએ જણાવ્યું હતું કે, દીપક કુમાર મીણાએ આત્મહત્યા કરી હોવાનું પ્રારંભિક તપાસમાં જાણવા મળ્યું છે. પોલીસને દીપક કુમારનો મૃતદેહ કોહવાયેલી હાલતમાં મળી આવ્યો હતો. પોલીસે સીસીટીવી કેમેરાની તપાસ શરૂ કરી છે.

વિદ્યાર્થી 10 સપ્ટેમ્બર બાદથી ગુમ હતો :

દીપક કુમાર મીણાના પિતાએ જણાવ્યા પ્રમાણે, તેમનો દીકરો યુપીએસસી પ્રિલિમ્પની પરિક્ષામાં ઉતીર્ણ થયા બાદ મેઈન્સની તૈયારી કરવા જુલાઈમાં દિલ્હી આવ્યો હતો. દરરોજ સાંજે તે ઘરે ફોન કરતો હતો. પરિવારજનોની તેની સાથે અંતિમ વાતચીત 10 સપ્ટેમ્બરે થઈ હતી. 13 સપ્ટેમ્બર સુધી ફોન ન આવતાં પિતા પુત્રને શોધવા દિલ્હી આવ્યા હતા.દીપકના પિતા તેના પીજી ગયા હતા. ત્યાં તેની સાથે રહેતાં અન્ય વિદ્યાર્થીઓએ જણાવ્યું કે, તે બે દિવસથી ઘરે જ નથી આવ્યો. બાદમાં પોલીસને તેની ગુમ થવાની ફરિયાદ નોંધાવી હતી. તપાસ દરમિયાન મીણાનો મૃતદેહ મળી આવ્યો હતો.

કોઈ સુસાઈડ નોટ ન મળી :

પોલીસ અધિકારીએ જણાવ્યું હતું કે, શંકા છે કે, લાઈબ્રેરીમાં ભણ્યા બાદ દીપક જંગલ તરફ ગયો હતો. દીપકનું બેગ તે વૃક્ષ સાથે જ લટકેલુ હતું. અને ત્યાંથી કોઈ સુસાઈડ નોટ મળી ન હતી. પોસ્ટમોર્ટમ કર્યા બાદ મૃતદેહ પરિવારજનોને સોંપવામાં આવ્યો હતો.