રિટેલ ફુગાવાના મોરચે હાલના તબક્કે મોટી રાહતની અપેક્ષા
છેલ્લા બે મહિનાથી રિટેલ ફુગાવો 6 ટકાથી ઉપર
RBI આજે તેની મોનેટરી પોલિસી જાહેર કરશે. રિટેલ ફુગાવાને નિયંત્રણમાં રાખવા RBI ફરી રેપો રેટમાં 0.25 ટકાનો વધારો કરી શકે તેવી સંભાવના છે. ફેબ્રુઆરીમાં મળેલી MPCની બેઠકમાં રેપો રેટ 0.25 ટકા વધારીને 6.50 ટકા કરવામાં આવ્યો હતો. તે બેઠકમાં RBIએ કહ્યું હતું કે રિટેલ ફુગાવાને નિયંત્રણમાં રાખવા અને ઉચ્ચ વૃદ્ધિ દર જાળવી રાખવા માટે મુખ્ય નીતિ દરમાં 0.25 ટકાનો વધારો કરવામાં આવ્યો છે.
SBI પાસે નરમ વલણ અપનાવવા માટે પૂરતા કારણો
SBIના મુખ્ય આર્થિક સલાહકાર સૌમ્ય કાંતિ ઘોષનું કહેવું છે કે RBI પાસે હવે એપ્રિલની સમીક્ષામાં રેપો રેટ ન વધારવાના પૂરતા કારણો છે. લિક્વિડિટી મોરચે સમસ્યાઓ હોવા છતાં મધ્યસ્થ બેન્ક આગામી MPC મીટિંગમાં નરમ વલણ અપનાવી શકે છે. જોકે RBI પાસે જૂનમાં યોજાનારી MPCની બેઠકમાં રેપો રેટ વધારવાનો વિકલ્પ છે.
ફુગાવો 5.5 ટકાની નજીક રહી શકે
સૌમ્ય ઘોષે જણાવ્યું હતું કે રિટેલ ફુગાવાના મોરચે હાલના તબક્કે મોટી રાહતની અપેક્ષા છે. છેલ્લા 10 વર્ષમાં સરેરાશ ફુગાવાનો દર 5.8 ટકા રહ્યો છે. આગામી દિવસોમાં છૂટક ફુગાવો 5.5 ટકા અથવા તેનાથી નીચે આવે તેવી શક્યતા ઓછી છે. છેલ્લા બે મહિનાથી રિટેલ ફુગાવો 6 ટકાથી ઉપર છે. ફેબ્રુઆરીમાં રિટેલ ફુગાવો 6.44 ટકા અને જાન્યુઆરીમાં 6.52 ટકા હતો.
છૂટક ફુગાવો 6 ટકાથી ઉપર રહ્યો
બેંક ઓફ બરોડાના ચીફ ઈકોનોમિસ્ટ મદન સબનવીસ કહે છે કે છેલ્લા બે મહિનાથી છૂટક ફુગાવો 6 ટકાથી ઉપર રહ્યો છે અને લિક્વિડિટી પણ તટસ્થ થઈ ગઈ છે, એવો અંદાજ છે કે RBI રેપો રેટમાં 0.25 ટકાનો વધારો કરી શકે છે. ઉપરાંત સંકેત આપી શકે છે કે દર વધારવાનો તબક્કો પૂરો થઈ ગયો છે. રેપો રેટમાં મે 2022થી 2.50 ટકાનો વધારો થયો છે.