બેંગલુરુમાં 7 શાળાને બોમ્બથી ઉડાવી દેવાની ધમકી આપવામાં આવી છે. એ બાદ પોલીસે શાળાઓમાંથી વિદ્યાર્થીઓને બહાર કાઢ્યા છે. ન્યૂઝ એજન્સી યુએનઆઈના જણાવ્યા અનુસાર, બેંગલુરુની 7 શાળાને મેલ દ્વારા બોમ્બની ધમકી આપવામાં આવી હતી. આ પછી પોલીસે આ તમામ શાળામાંથી વિદ્યાર્થીઓને બહાર કાઢ્યા છે. બેંગલુરુ શહેરના પોલીસ કમિશનર કમલ પંતે કહ્યું હતું કે પોલીસની ટીમ આ શાળાઓમાં તપાસ કરી રહી છે. શાળાઓને મેલ દ્વારા ધમકી આપવામાં આવી છે, એમાં લખવામાં આવ્યું છે – તમારી શાળામાં ખૂબ જ શક્તિશાળી બોમ્બ પ્લાન્ટ કરવામાં આવ્યો છે. આ મજાક નથી, તાત્કાલિક પોલીસને આ બાબતે જાણ કરો.
આ શાળાઓને બોમ્બથી ઉડાવી દેવાની ધમકી આપતો ઈમેલ મળ્યો
1. DPS વર્થુર
2. ગોપાલન ઇન્ટરનેશનલ સ્કૂલ
3. ન્યૂ એકેડેમી સ્કૂલ
4. સેન્ટ વિન્સેન્ટ પોલ સ્કૂલ
5. ઇન્ડિયન પબ્લિક સ્કૂલ ગોવિંદપુરા
6. એબેનેઝર ઇન્ટરનેશનલ સ્કૂલ, ઇલેક્ટ્રોનિક સિટી
પ્રાપ્ત માહિતી અનુસાર, હાલ તમામ શાળાઓમાં પરીક્ષાઓ ચાલી રહી છે. આ દરમિયાન સવારે 11 વાગ્યે શાળાઓને એક ઈમેલ આવ્યો હતો કે શાળામાં બોમ્બ મૂકવામાં આવ્યો છે. આ પછી પોલીસ તાત્કાલિક ઘટનાસ્થળે પહોંચી ગઈ હતી.