Gondal Market Yard: ગુજરાતમાં નંબર વન ગણાતા ગોંડલ માર્કેટ યાર્ડના ફ્રુટ અને શાકભાજી માર્કેટ યાર્ડમાં ફળોના સ્વાદ પ્રેમીઓ જેમની આતુરતા પૂર્વક રાહ જોઈ રહ્યા હતા તેવી મીઠી મધુર કેસર કેરી (Kesar Mango)નું આગમન થવા પામ્યું છે.ગુજરાતભરમાં પ્રથમ દિવસે ગોંડલ માર્કેટ યાર્ડમાં કેસર કેરીનું સૌથી વધુ ગોંડલ માર્કેટ આ વર્ષે માર્કેટ યાર્ડમાં ફળોની રાણી ગણાતી મીઠી મધુર કેસર કેરીનું આગમન 18થી 20 દિવસ વહેલુ જોવા મળ્યું છે. બજારમાં કેસર કેરીની સિઝનના પ્રારંભ સાથે કેસર કેરીના સ્વાદ પ્રેમીઓનો કેરીના આગમનને લઈને આતુરતાનો અંત આવ્યો છે.

ગોંડલ ફ્રુટ માર્કેટ યાર્ડમાં પ્રથમ દિવસે ઉનાના જસાધાર અને બાબરીયાની કેસર કેરીના 190 બોક્સની આવક થવા પામી હતી.આ સાથે જ પ્રથમ દિવસે કેસર કેરીની હરાજીમાં 10 કિલો કેરીના બોક્સના ભાવ રૂપિયા 1800/-થી 2100/-સુધીના બોલાયા હતા.પ્રથમ દિવસે જ કેસર કેરીના ખેડૂતોને શુકનના ભાવ રૂપિયા 2100/-બોલાતા ખેડૂતોમાં પણ આનંદની લાગણી ફેલાઈ જવા પામી હતી ગોંડલના ફ્રૂટના વેપારી દિવ્યેશભાઈ રાદડિયાએ જણાવ્યું છે કે, આજે ગોંડલ યાર્ડમાં કેસર કેરીનું આગમન થયું છે. કેસર કેરીના સ્વાદના શોખીનો માટે આ સારા સમાચાર છે.આજે કેરીને 1800થી 2100 ભાવ નીકળ્યા છે. આ વખતે 20 દિવસ વહેલું કેરીનું આગમન બજારમાં થયું છે. ખેડૂતો પણ સારા ભાવ મળતા ખુશ છે અને વેપારી પણ ખુશ છે. એકદમ સરસ કેરી આવી છે.