અમેરિકાની ટ્રમ્પ સરકારે કરેલી કાર્યવાહી બાદ 37 ગુજરાતીઓ સહિત 104 ભારતીય ઈમિગ્રન્ટસને પાછા વિમાન માર્ગે ધકેલવામાં આવ્યા છે. જેમાં ઉત્તર ગુજરાતના મહેસાણા, પાટણ, ગાંધીનગર અને બનાસકાંઠા જિલ્લાના 32 લોકોનો સમાવેશ થાય છે. આ સમગ્ર મામલે વતનમાં પરત ફરી રહેલા લોકોના પરિવાર અને ગ્રામજનોએ કંઈપણ કહેવાનો ઇનકાર કરીને સુચક ચુપકીદી સાધી લીધી છે. જોકે, પાછા ધકેલાયેલા લોકોની પોલીસ દ્વારા પુછપરછ કરવામાં આવનાર સંભવિત પુછપરછમાં કબુતરબાજીની ચોંકાવનારી હકિકતનો પર્દાફાશ થવાની શક્યતા રહેલી છે.
ઉત્તર ગુજરાતના 32 લોકોને ડિપોર્ટ કરવામાં આવ્યા :
ઉત્તર ગુજરાતના મહેસાણા, ગાંધીનગર, પાટણ અને બનાસકાંઠા જિલ્લાના જોરણંગ, વસાઈ, ડાભલા, ચંદ્રનગર, ખેરવા, મેઉ, ખણુંસા, ડભાડા, વાલમ, ડીસા, સિઘ્ધપુર, બોરૂ, વડસ્મા, માણસા, મણુંદ, ઈન્દ્રપુરા સહિતના ગામોના 32 લોકોનો સમાવેશ થાય છે. અમેરિકામાં ધુસણખોરી કરતા પકડાયેલા ઉત્તર ગુજરાતના લોકોમાં મહેસાણા જિલ્લાના 9, ગાંધીનગર જિલ્લાના 14, પાટણ જિલ્લાના 4, બનાસકાંઠાના 1વ્યકિતને અમેરિકાથી પરત મોકલવામાં આવ્યા હોવાની યાદી જાહેર કરવામાં આવી છે.મહેસાણા જિલ્લામાં ખેરવા, જોરણંગ, મેઉ આસપાસના ગામડાઓને ડોલરિયો વિસ્તાર તરીકે ઓળખવામાં આવે છે. આ પંથકમાંથી અનેક લોકો વર્ષોથી અમેરિકા સહિત વિદેશોમાં વસવાટ કરી રહ્યો હોવાનું જાણવા મળે છે. દરમિયાન, અમેરિકા સરકારે કરેલી કાર્યવાહી બાદ ગેરકાયદેસર ધુસણખોરી કરતા પકડાયેલા ભારતીયોને ડિપોર્ટ કરવામાં આવતાં મહેસાણાનો ડોલરિયો વિસ્તાર ચર્ચાના એરણે આવ્યો છે.