અમદાવાદ: ભારતની પ્રથમ ‘ડિજિટલ અરેસ્ટ’ સ્કેમ પર આધારિત ગુજરાતી ફિલ્મ ‘ધરપકડ’ તેની અનોખી વાર્તાને કારણે અત્યારે સમગ્ર ગુજરાતમાં ચર્ચાનું કેન્દ્ર બની છે. મલ્હાર ઠાકર અને શ્રુહદ ગોસ્વામી સ્ટારર આ ફિલ્મનું નવું આકર્ષણ એટલે કે ફિલ્મનું ટાઇટલ ટ્રેક જેવું પાવરફુલ રેપ સોન્ગ ‘છળકપટની ધરપકડ’ આજે સત્તાવાર રીતે રિલીઝ કરવામાં આવ્યું છે.
આ સોન્ગ ‘રેપ’ સ્ટાઈલમાં તૈયાર કરવામાં આવ્યું છે, જે સાયબર ગુનાની દુનિયાના અંધકાર અને તેનાથી થતી લાચારીને અત્યંત પ્રભાવશાળી રીતે રજૂ કરે છે. સોન્ગના ગાયક અને ગીતકાર આર્યન સૌરવ છે, જેમણે પોતાના ધારદાર શબ્દોથી ડિજિટલ યુગમાં છુપાયેલા ગુનેગારોનો પર્દાફાશ કર્યો છે. ગીતનું સંગીત જપજી દ્વારા કમ્પોઝ કરવામાં આવ્યું છે, જેમાં એડિશનલ વોકલ્સ તરીકે જપજી, ધ ઇન્ડિયન કોરલ એન્સેમ્બલ અને પ્રતિકાનો સમાવેશ થાય છે.
‘છળકપટની ધરપકડ’ ગીત માત્ર મનોરંજન નથી પરંતુ એક સામાજિક જાગૃતિનું માધ્યમ છે. જે રીતે ટેકનોલોજીના નામે લોકોના ડેટા ચોરી કરીને તેમને ‘ડિજિટલ અરેસ્ટ’ના નામે લૂંટવામાં આવે છે, તે સમગ્ર પ્રક્રિયાને આ ગીતના લિરિક્સમાં વણી લેવામાં આવી છે. સોન્ગના બીટ અને મ્યુઝિક ફિલ્મના ક્રાઈમ થ્રિલર માહોલને વધુ સચોટ બનાવે છે.
ઇન્દિરા મોશન પિક્ચર્સ અને નવેમ્બર ફિલ્મ્સ દ્વારા પ્રસ્તુત આ ફિલ્મમાં મલ્હાર ઠાકર, શ્રુહદ ગોસ્વામી અને પ્રશાંત બારોટ જેવા કલાકારો મુખ્ય ભૂમિકામાં છે. દિગ્દર્શક અનિશ શાહે આ ફિલ્મ દ્વારા દરેક સ્માર્ટફોન યુઝરને એક મહત્વની ચેતવણી આપી છે કે ઇન્ટરનેટ એક માયાવી જાળછે.
ફિલ્મ ‘ધરપકડ’ આગામી 15 મે, 2026 ના રોજ સિનેમાઘરોમાં રિલીઝ થવા જઈ રહી છે. અત્યારે આ નવું સોન્ગ ‘છળકપટની ધરપકડ’ સોશિયલ મીડિયા અને મ્યુઝિક પ્લેટફોર્મ પર ધૂમ મચાવી રહ્યું છે.