ગુજરાતમાં સ્થાનિક સ્વરાજ્યની સંસ્થાઓ માટે આવતીકાલે મતદાન યોજાશે, જેમાં 25 હજારથી વધુ ઉમેદવારોનું ભવિષ્ય ઈવીએમમાં સીલ થશે. અનેક બેઠકો બિનહરીફ જાહેર થતા હવે 9263 બેઠકો પર જંગ જામશે.
ગુજરાતમાં સ્થાનિક સ્વરાજ્યની સંસ્થાઓ માટે આવતીકાલે તા. 26 એપ્રિલ, 2026ના રોજ મતદાન યોજાનાર છે. રાજ્યભરમાં લાખો મતદારો પોતાના મતાધિકારનો ઉપયોગ કરશે, જ્યારે હજારો ઉમેદવારોનું ભવિષ્ય ઈવીએમમાં સીલ થવાનું છે. રાજ્યની 15 મહાનગરપાલિકાઓ, 84 નગરપાલિકાઓ, 34 જિલ્લા પંચાયતો અને 260 તાલુકા પંચાયતોની સામાન્ય ચૂંટણી સાથે 11 નગરપાલિકાઓની પેટા ચૂંટણી માટે મતદાન યોજાશે. ચૂંટણી પહેલા જ અનેક બેઠકો બિનહરીફ જાહેર થઈ ચૂકી છે, જ્યારે બાકીની બેઠકો માટે કડક જંગ જોવા મળશે.સ્થાનિક સ્વરાજ્યની સંસ્થાઓની ચૂંટણીમાં 1) અડીયા તાલુકા પંચાયત, તા. હારીજ, જિ. પાટણ અને 2) 11-સતલાસણા તાલુકા પંચાયત, તા. સતલાસણા, જિ. મહેસાણાની બેઠક પર એક પણ ઉમેદવાર તરફથી ઉમેદવારી ફોર્મ રજૂ થયેલ ન હોવાથી ચૂંટણી નહીં યોજાય.સ્થાનિક સ્વરાજ્યની સંસ્થાઓની ચૂંટણીમાં 1) 3-આસ્તાન તાલુકા પંચાયત, તા. બારડોલી, જિ. સુરત, 2) 4-દહેગામડા તાલુકા પંચાયત, તા. બાવળા, જિ. અમદાવાદ, અને 3) 6-ચિતરીયા તાલુકા પંચાયત, તા. વિજયનગર, જિ.સાબરકાંઠા બેઠકો પરના માન્ય રાજકીય પક્ષના ઉમેદવારોનું ચાલુ ચૂંટણી પ્રક્રિયા દરમિયાન અવસાન થવાથી, આ ત્રણ બેઠકો પૂરતી ચૂંટણી હાલ રદ કરવામાં આવેલ છે.