રાજ્યમાં વરસાદે વિરામ લીધો છે, ત્યારે આજે શનિવારે હવામાન વિભાગની આગાહી સામે આવી છે. જેમાં ફરી એક વખત રાજ્યમાં વરસાદની આગાહી કરવામાં આવી છે.
અમદાવાદ: રાજ્યમાં વરસાદે વિરામ લીધો છે, ત્યારે આજે શનિવારે હવામાન વિભાગની આગાહી સામે આવી છે. જેમાં ફરી એક વખત રાજ્યમાં વરસાદની આગાહી કરવામાં આવી છે. બે સિસ્ટમની અસરના પગલે રાજ્યમાં હળવાથી મધ્યમ વરસાદની સાથે થંડર સ્ટોર્મની આગાહી કરવામાં આવી છે. સાથે જ બંગાળની ખાડીમાં વધુ એક સિસ્ટમ બની છે. આગામી સાત દિવસ દરમિયાન ગુજરાતના તમામ જિલ્લાઓમાં હળવાથી મધ્યમ વરસાદની સંભાવના હવામાન વિભાગના વૈજ્ઞાનિક રામાશ્રય યાદવ દ્વારા વ્યક્ત કરવામાં આવી છે. સાથે જ તેમણે આગામી ચાર દિવસ દરમિયાન હળવા થંડર સ્ટોર્મની આગાહી કરી છે. જેમાં પવનની ગતિ 30થી 40 કિલોમીટર પ્રતિ કલાક રહેવાની સંભાવના છે.તેમણે જણાવ્યું કે, અત્યારે એક મોન્સૂન ટ્રફ છે અને અરબ સાગરમાં એક સાયક્લોનિક સર્ક્યુલેશન છે. જેના લીધે આગામી ચાર દિવસ હળવા થંડર સ્ટોર્મની ચેતવણી છે. એક લો પ્રેશર બંગાળની ખાડીમાં બન્યું છે, આગામી 24 કલાક દરમિયાન તેની હલચલ પશ્ચિમ ઉત્તર પશ્ચિમ દિશામાં રહેશે. આ સિસ્ટમના પ્રભાવને જોતાં આગામી ચાર દિવસ ગુજરાતમાં થંડર સ્ટોર્મની ચેતવણી આપવામાં આવી છે.