અમદાવાદમાં સોલા હાઈકોર્ટ પોલીસે દારૂની દાણચોરીની એક મોટી કાર્યવાહીનો પર્દાફાશ કર્યો છે. જેમાં હોસ્પિટલની દવાની બોટલોની આડમાં ભારતીય બનાવટનો વિદેશી દારૂ અને બિયર મળીને કુલ 5,520 બોટલના જથ્થા સાથે પોલીસે પંજાબના બે શખસની ધરપકડ કરી છે. પોલીસે કુલ રૂ.50.9 લાખનો મુદ્દામાલ જપ્ત કરીને આગળની કાર્યવાહી હાથ ધરી છે.પોલીસના જણાવ્યા અનુસાર, સોલા હાઈકોર્ટ પોલીસ સર્વેલન્સની ટીમે બાતમીના આધારે ગુરુવારે (30 ઓક્ટોબર) મોડી રાત્રે એસ.જી. હાઈવે ગોતા બ્રિજ પાસે શંકાસ્પદ ટ્રકને અટકાવ્યો હતો. જેમાં તપાસ કરતાં ટ્રકમાં હોસ્પિટલની દવાની બોટલ તરીકે લેબલવાળા બોક્સ મળી આવ્યા હતા, જેમાં વિવિધ બ્રાન્ડના 5,520 બોટલ અને દારૂના ટીન મળી આવ્યા હતા.પોલીસે વ્હિસ્કી દારૂ અને બીયરની 5,520 બોટલ, રૂ.20 લાખની કિંમતનો ટ્રક, બે મોબાઇલ ફોન અને ગેરકાયદે માલ માટે કવરમાં ઉપયોગમાં લેવામાં આવતી લગભગ 59,904 ખાલી દવાની બોટલો જપ્ત કરી હતી.