(જી.એન.એસ)અમદાવાદ,
ટાટા ગ્રુપની ધ ઇન્ડીયન હોટેલ્સ કંપની લિમિટેડ અમદાવાદની સંકલ્પ ઇનની સાથે મળીને ગુજરાતની સૌથી મોટી ફાઇવ સ્ટાર હોટલનું નિર્માણ કરશે. ‘ધ ઇન્ડીયન હોટેલ્સ’એ અમદાવાદમાં તાજ હોટેલ બનાવવા માટે ‘સંકલ્પ ઇન’ સાથે સમજૂતિ કરાર કર્યા હતા. શહેરના એસપી રિંગરોડથી નજીક સિંધુભવન રોડ પર ૧.૪ એકરમાં બનનારી આ આલિશાન હોટલમાં ૩૧૫ જેટલા રૂમ હશે અને આ હોટેલ વર્ષ ૨૦૨૦ની શરૂઆતમાં કાર્યરત થઈ જવાની સંભાવના છે.
બંને કંપનીઓ વચ્ચે થયેલા કરાર મુજબ હોટેલની પ્રોપર્ટી સંકલ્પ દ્વારા તૈયાર થશે, જ્યારે હોટલનું મેનેજમેન્ટ તાજ કરશે. હાલ ૨૦ વર્ષ માટે આ કરાર કરવામાં આવ્યા છે જેને આગળ જતાં રિન્યૂ કરવામાં આવશે. ઇન્ડીયન હોટેલ્સ દુનિયાનાં ૪ ખંડો, ૧૨ દેશો અને ૮૦થી વધારે શહેરોમાં ૧૭૯ હોટેલ્સ ઓપરેટ કરે છે, જેમાં ૩૦ નિર્માણાધિન છે. સંકલ્પ-ઇન હોસ્પિટાલિટી, પેકેજ્ડ ફૂડ્‌સ, ઉત્પાદન અને વિતરણ, નિકાસ, હોટેલિએરિંગ અને રિયલ એસ્ટેટમાં કાર્યરત ડાઇવર્સિફાઇડ કંપની છે. અમદાવાદમાં સ્પેશિયાલિટી રેસ્ટોરાં સાથે શરૂઆત કરનાર ગ્રૂપ અત્યારે દુનિયાભરમાં ૧૫૦થી વધારે સફળ રેસ્ટોરાં ચલાવે છે.