આજે દેશભરમાં હનુમાન જયંતીનો તહેવાર ઉજવાશે. આ તહેવારને ધ્યાનમાં રાખી ગૃહમંત્રાલયે બધા જ રાજ્યો અને કેન્દ્રશાસિત પ્રદેશોને કાયદો અને વ્યવસ્થાની સ્થિતિ જાળવવા તેમજ શાંતિ અને સદ્ભવાના ખોરવાય નહીં તેની તકેદારી રાખવા નિર્દેશ આપ્યા છે. અનેક રાજ્યોમાં હનુમાનજીની શોભાયાત્રાઓ કાઢવામાં આવશે. આ સંદર્ભમાં ગયા સપ્તાહે પશ્ચિમ બંગાળ, બિહાર સહિત કેટલાક રાજ્યોમાં ફાટી નીકળેલા કોમી રમખાણોને ધ્યાનમાં રાખી ગૃહમંત્રાલયે બધા જ રાજ્યોને સંવેદનશીલ વિસ્તારોમાં કાયદો-વ્યવસ્થા જાળવવા વધુ તકેદારી રાખવા એડવાઈઝરી પણ રજૂ કરી છે.

હનુમાન જયંતિ પર હિંસા ન થાય તેને લઈ સરકાર તૈયાર 

આ ઉપરાંત રામનવમીએ અનેક રાજ્યોમાં જોવા મળેલી હિંસા બાદ આજના દિવસે સુરક્ષા પગલે પણ સરકારે પૂરી તૈયારી દાખવી છે. રામનવમીમાં બંગાળથી લઈને બિહાર, ઝારખંડ સુધી સ્થિતિ ખરાબ જોવા મળી હતી. જે બાદ આજે હનુમાન જયંતિ નિમિતે વિવિધ સ્થળોએ  શોભાયાત્રા નીકળશે અને મંદિરોમાં ભક્તોની ભીડ જોવા મળશે. જેને લઈ વહીવટીતંત્રને ચિંતા છે કે બદમાશો દ્વારા લોકોનો આસ્થા ભંગ ન થાય. રામ નવમીની જેમ ફરી એકવાર હનુમાન જયંતિ પર હિંસા ન ભડકે જેને લઇ સરકારે ગઈકાલે ગાઈડલાઈન્સ પણ રજૂ કરી હતી. 

પશ્ચિમ બંગાળને હાઈકોર્ટે લગાવી ફટકાર 

પશ્ચિમ બંગાળ હજુ પણ હિંસાની પકડમાં છે, ત્યાંનું પ્રશાસન હનુમાન જયંતિને લઈને વધુ તૈયારી દાખવી રહ્યું છે. કલકત્તા હાઈકોર્ટે પશ્ચિમ બંગાળ સરકારને પૂછ્યું કે, હનુમાન જયંતિને લઈને કેવી વ્યવસ્થા છે? કલકત્તા હાઈકોર્ટે મમતા સરકારને પણ સૂચના આપી છે કે, જો બંગાળ પોલીસ પરિસ્થિતિને સંભાળવામાં સક્ષમ ન હોય તો અર્ધલશ્કરી દળને તૈનાત કરવામાં આવે, જ્યાં કલમ 144 લાગુ હોય, ત્યાંથી કોઈ સરઘસ કે સરઘસ ન કાઢવામાં આવે.

દિલ્હીમાં પણ પોલીસ સંપૂર્ણ રીતે તૈયાર

બંગાળ ઉપરાંત દિલ્હીમાં પણ આ સમયે એલર્ટ પર છે. ગત વર્ષે હનુમાન જયંતિ પર જે હિંસા થઈ હતી તેને ધ્યાને લઇ ફરી એ જ સ્થિતિ ન સર્જાય, એટલા માટે દિલ્હીમાં પણ પોલીસ સંપૂર્ણ રીતે તૈયાર છે. દિલ્હીના જહાંગીરપુરીમાં સુરક્ષા દળો માર્ચ કરી રહ્યા છે, આ માર્ચ એટલા માટે છે કે ગયા વર્ષની જેમ હનુમાન જયંતિ પર કોઈ ઉપદ્રવ ન થાય.