આજકાલ સોશિયલ મીડિયા પર મહિલાઓ મેકઅપ વગરના ફોટા બિન્દાસ મૂકી રહી છે, જેમાં અભિનેત્રીઓ પણ શામિલ છે. જેવા છીએ એવા દેખાઈએ છીએ અને એવા જ સ્વીકારો એવી નારીજગતની પ્રબળ ઇચ્છા મેક-અપ વગરના ફોટો શેર કરવા પાછળ વ્યક્ત થઈ રહી છે.મેક-અપ વગર લારાનો ચહેરો એકદમ જુદો લાગે છે.એક સમય હતો કે અભિનેત્રી મેક-અપ વગરના ચહેરા સંતાડતી, હાલ મેક-અપ વગરના ફોટા શેર કરવાનો ટ્રેન્ડ ચાલ્યો છે. એટલું જ નહીં, ઘણી દમદાર અભિનેત્રીઓ રૂપેરી પડદા પર પણ મેક-અપ વગર આવવાની હિંમત બતાડી રહી છે. મેક-અપ વગરની સુંદરતા પણ સ્વીકાર્ય બની રહી છે.મિસ વર્લ્ડનો ખિતાબ જીતી ચૂકેલી લારા દત્તાએ પણ તાજેતરમાં ઇન્સ્ટાગ્રામ પર પોતાનીમેક-અપ વગરની તસવીર શેર કરી હતી, જેમાં તેણે ‘સવારના ચહેરાઓ, ડર વગર જીવો’ કેપ્શન પણ મૂકી હતી. લારા દત્તાએ તેના પેટ ડોગ કિકીની તસવીર પણ ઇન્સ્ટા પર શેર કરી હતી.છેલ્લા થોડા સમયમાં સોનમ કપૂર, કાજલ અગ્રવાલ, કરીના કપૂર ખાન જેવી અભિનેત્રીઓએ પણ મેક-અપ વગરની તેમની તસવીરો શેર કરી હતી. ૧૬ વર્ષ પહેલાં ‘અંદાજ’ ફિલ્મથી પદાર્પણ કરનાર લારા દત્તાને બેસ્ટ ડેબ્યુ ફિમેલનો ફિલ્મફેર એવૉર્ડ મળી ચૂક્યો છે. લારાએ અંદાજ, મુંબઈ સે આયા મેરા દોસ્ત, ખાકી, મસ્તી, નો-એન્ટ્રી, બર્દાશ્ત જેવી ફિલ્મોમાં કામ કર્યું છે. ૨૦૧૧માં લારા વિશ્ર્વપ્રસિદ્ધ ટેનિસ પ્લેયર મહેશ ભૂપતિ સાથે લગ્નગ્રંથિથી જોડાઇ હતી. લારા દત્તાની પુત્રીનું નામ સાયરા છે. લગ્ન બાદ પણ લારાએ ડોન-૨, સિંઘ ઇઝ કિંગ, ફિતુર, અજહર, વેલકમ ટુ ન્યૂ યૉર્ક ફિલ્મમાં અભિનય આપ્યો છે. લારા સોશિયલ મીડિયા પર સક્રિય છે. તેના પ્રશંસકો સાથે તે તસવીરો શેર કરતી રહે છે.