વડોદરા: ગુજરાતમાં સરકારી અને ખાનગી સંસ્થાઓને બોમ્બથી ઉડાવી દેવાની ધમકી આપવાનો સિલસિલો અટકવાનું નામ નથી લઈ રહ્યો. ગઈકાલે અમદાવાદની શાળાઓ બોમ્બથી ઉડાવી દેવાની ધમકી મળ્યા બાદ તંત્ર દોડતું થયું હતું, જે બાદ આજે ફરી એકવાર વડોદરા કલેક્ટર કચેરીને બોમ્બથી ઉડાવી દેવાની ધમકીભર્યો ઈ-મેઈલ મળ્યા બાદ તંત્ર દોડતું થયું છે. મળતી જાણકારી મુજબ, વડોદરા કલેક્ટર કચેરીના સત્તાવાર ઈ-મેઈલ આઈડી પર એક ધમકીભર્યો ઈ-મેઈલ મળ્યો છે. જેમાં અત્યંત ખતરનાક ગણાતા RDX બોમ્બનો ઉલ્લેખ કરવામાં આવ્યો હતો. ઈ-મેઈલમાં સ્પષ્ટ લખવામાં આવ્યું હતું કે, “કલેક્ટર ઓફિસમાં RDX મૂકવામાં આવ્યું છે અને બપોરે 1:00 વાગ્યા સુધીમાં આ બોમ્બ બ્લાસ્ટ થશે.” ઈ-મેઈલ મોકલનાર શખ્સે ઓફિસ ખાલી કરી દેવાની પણ ચેતવણી આપી છે.આ ધમકી મળતા જ ગંભીરતાને ધ્યાને રાખીને તુરંત જ પોલીસના ઉચ્ચ અધિકારીઓ ઘટનાસ્થળે પહોંચી ગયા છે અને સઘન સર્ચ ઓપરેશન હાથ ધર્યું છે. બોમ્બ ડિસ્પોઝલ સ્ક્વોડ (BDS) અને ડોગ સ્ક્વોડની ટીમો દ્વારા કચેરીના ખૂણેખૂણાની તપાસ કરવામાં આવી રહી છે. સાથે જ સુરક્ષાના કારણોસર કચેરીમાં હાજર કર્મચારીઓ અને અરજદારોને તાત્કાલિક બહાર કાઢી પરિસર ખાલી કરાવવામાં આવ્યું છે. તો આ તરફ ઈ-મેઈલ ક્યાંથી અને કોણે મોકલ્યો છે તે જાણવા માટે સાયબર ક્રાઈમની ટીમ પણ સક્રિય થઈ છે.