અમદાવાદ: ચાર્ટર્ડ અકાઉન્ટન્ટ્સ ડેના ૭૮મા અવસરે, ઇન્સ્ટિટ્યૂટ ઓફ ચાર્ટર્ડ અકાઉન્ટન્ટ્સ ઓફ ઇન્ડિયા (ICAI)ના ગૌરવસભર પ્રવાસને આપણે ઉજવીએ છીએ. ૧ જુલાઈ, ૧૯૪૯ના રોજ સંસદીય અધિનિયમ દ્વારા સ્થાપિત ICAI આજે વિશ્વની અગ્રણી વ્યાવસાયિક સંસ્થાઓમાં સ્થાન ધરાવે છે, જેને અનુલક્ષીને ધી ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા (ICAI) ની અમદાવાદ બ્રાન્ચ દ્વારા આજે ‘સીએ ડે’ (CA Day) ની ઉત્સાહભેર ઉજવણી કરવામાં આવી હતી. આ નિમિત્તે પ્રોફેશનલ્સમાં સ્વાસ્થ્ય પ્રત્યે જાગૃતિ લાવવા અને રાષ્ટ્રભાવનાને સુદ્રઢ કરવાના ઉદ્દેશ્ય સાથે વહેલી સવારે ‘વૉકાથોન’ અને ત્યારબાદ ભવ્ય CA ફ્લેગ હોસ્ટિંગનું આયોજન કરવામાં આવ્યું હતું.
વહેલી સવારે ૬:૦૦ વાગ્યે અમદાવાદના આકર્ષણ સમાન સાબરમતી રિવરફ્રન્ટ ખાતે એક ભવ્ય ‘વૉકાથોન’ (Walkathon) નું આયોજન કરવામાં આવ્યું હતું. જેમાં મોટી સંખ્યામાં ચાર્ટર્ડ એકાઉન્ટન્ટ્સ, વિદ્યાર્થીઓ અને અગ્રણી નાગરિકો ઉત્સાહપૂર્વક જોડાયા હતા. ફિટનેસ અને તંદુરસ્ત જીવનશૈલીના સંદેશ સાથે યોજાયેલી આ વૉકાથોન આકર્ષણનું કેન્દ્ર બની હતી.
વૉકાથોન બાદ સવારે ૯:૦૦ વાગ્યે સંસ્થાના પરિસરમાં ગૌરવભેર ‘સીએ ધ્વજવંદન’ (CA Flag Hoisting) નો કાર્યક્રમ યોજાયો હતો. ઉપસ્થિત તમામ સભ્યોએ રાષ્ટ્ર અને અર્થતંત્રના વિકાસમાં સીએ પ્રોફેશનની ભૂમિકાને બિરદાવી સીએ ધ્વજને સલામી આપી હતી.
ICAI અમદાવાદના ચેરમેન સીએ રિંકેશ શાહે (CA Rinkesh Shah) આ પ્રસંગે તમામ સભ્યોને સીએ દિવસની શુભેચ્છાઓ પાઠવતા જણાવ્યું હતું કે, “દેશના આર્થિક વિકાસમાં ચાર્ટર્ડ એકાઉન્ટન્ટ્સ હંમેશા ‘બેકબોન’ સમાન રહ્યા છે. આજના આ વિશેષ દિવસે વૉકાથોન દ્વારા અમે હેલ્થ એન્ડ વેલનેસનો સંદેશ આપવાનો પ્રયાસ કર્યો છે અને ધ્વજવંદન દ્વારા રાષ્ટ્ર નિર્માણ પ્રત્યેની અમારી પ્રતિબદ્ધતાને પુનઃ દોહરાવી છે.”
આ સમગ્ર કાર્યક્રમમાં ICAI અમદાવાદ મેનેજિંગ કમિટીના સભ્યો, વરિષ્ઠ ચાર્ટર્ડ એકાઉન્ટન્ટ્સ અને વિદ્યાર્થીઓ મોટી સંખ્યામાં હાજર રહી કાર્યક્રમને સફળ બનાવ્યો હતો.