સમાજના આગેવાનો અને પરિવારજનો અડાલજ પોલીસ મથકે પહોંચ્યા હતા. અડાલજ PI એસ.જી. દેસાઈના જણાવ્યા મુજબ પરિવારની રજૂઆત હતી કે, કાજલે લગ્ન કર્યા છે કે નહીં તેની તેમને કોઈ સત્તાવાર જાણકારી નથી.
ગુજરાતની વધુ એક જાણીતી લોકગાયિકા કાજલ મહેરિયાના લગ્નને લઈને મોટો વિવાદ ઊભો થયો છે. પરિવારની જાણ બહાર અને સમાજને વિશ્વાસમાં લીધા વગર પ્રેમલગ્ન કરી લેતા કાજલના ભાઈએ સોશિયલ મીડિયા પર પોસ્ટ મૂકી સમાજ પાસે મદદ માંગી હતી. આ વિવાદ રવિવારે ત્યારે વકર્યો જ્યારે 70 જેટલા લોકોના કાફલા સાથે પરિવાર કાજલની સાસરીમાં પહોંચી ગયો હતો.કાજલ મહેરિયાના ભાઈ સંદિપભાઈએ કરેલી જાહેર અપીલ મુજબ, સિંગરે સામાજિક મર્યાદાનો ભંગ કરીને લગ્ન કરી લીધા છે. ગોઢવા ગામના મહેરિયા પરિવારે આ મામલે મહેરિયા સમાજ અને 18 આલમને સમર્થન આપવા વિનંતી કરી છે. પરિવારનું કહેવું છે કે આ લગ્ન વિશે તેમને કોઈ જાણ કરવામાં આવી નહોતી. વિવાદિત સ્થિતિ ત્યારે સર્જાઈ જ્યારે કાજલના પરિવારજનો અને મહેરિયા સમાજના આગેવાનો અનેક ગાડીઓ સાથે ગાંધીનગરના શેરથા ગામે કાજલની સાસરીમાં પહોંચ્યા હતા. પરિસ્થિતિ વણસતી જોઈ કાજલના પતિએ 112 પર ફોન કરી મદદ માંગતા અડાલજ પોલીસ તાત્કાલિક ઘટનાસ્થળે દોડી ગઈ હતી અને મામલો થાળે પાડવાનો પ્રયાસ કર્યો હતો.બાદમાં સમાજના આગેવાનો અને પરિવારજનો અડાલજ પોલીસ મથકે પહોંચ્યા હતા. અડાલજ PI એસ.જી. દેસાઈના જણાવ્યા મુજબ પરિવારની રજૂઆત હતી કે, કાજલે લગ્ન કર્યા છે કે નહીં તેની તેમને કોઈ સત્તાવાર જાણકારી નથી. પોલીસ સમક્ષ કાજલ મહેરિયાએ જણાવ્યું હતું કે, તેણે લગ્ન કરી લીધા છે અને તેનું મેરેજ સર્ટિફિકેટ તે ટૂંક સમયમાં પોલીસને રજૂ કરી દેશે. હાલ આ મામલે કોઈ સત્તાવાર ફરિયાદ નોંધાઈ નથી, માત્ર પૂછપરછ બાદ બંને પક્ષો રવાના થયા હતા.