ભારત અને પાકિસ્તાન વચ્ચે વધતા જતા સંઘર્ષને કારણે, BCCI એ IPL એક અઠવાડિયા માટે મુલતવી રાખી છે. બીસીસીઆઈના ઉપાધ્યક્ષ રાજીવ શુક્લાએ શુક્રવારે આ માહિતી આપી. તેમણે કહ્યું, તે હવે એક અઠવાડિયા માટે મુલતવી રાખવામાં આવ્યું છે. નવું સમયપત્રક એક અઠવાડિયા પછી જાહેર કરવામાં આવશે.તે જ સમયે મીડિયા રિપોર્ટ્સ અનુસાર બધા વિદેશી ખેલાડીઓને તેમના દેશમાં પાછા ફરવાનું કહેવામાં આવ્યું છે. નવી તારીખો જાહેર થતાં જ તેમને જાણ કરવામાં આવશે. હાલમાં, IPLમાં 12 લીગ મેચ અને 4 પ્લેઓફ મેચ બાકી છે. ટુર્નામેન્ટની ફાઇનલ 25 મેના રોજ યોજાવાની હતી.એવું માનવામાં આવે છે કે ઓગસ્ટમાં ભારતનો બાંગ્લાદેશ પ્રવાસ રદ કરવામાં આવશે. સપ્ટેમ્બરમાં યોજાવાનો એશિયા કપ પણ મુલતવી રાખવામાં આવશે. તેમની જગ્યાએ, બાકીની IPL મેચો ભારતમાં યોજાઈ શકે છે.ગુરુવારે ચેન્નઈ-કોલકાતા આઇપીએલ મેચ દરમિયાન ઓપરેશન સિંદૂરના માનમાં રાષ્ટ્રગીત વગાડવામાં આવ્યું હતું.8 મેની રાત્રે લગભગ 8:30 વાગ્યે પાકિસ્તાને ભારતની જમ્મુ, પંજાબ અને રાજસ્થાન સરહદો પર મિસાઇલો અને ડ્રોનથી હુમલો કર્યો. આ દરમિયાન હિમાચલ પ્રદેશના ધર્મશાલામાં પંજાબ કિંગ્સ અને દિલ્હી કેપિટલ્સ વચ્ચે મેચ રમાઈ રહી હતી.પ્રથમ બેટિંગ કરતા પંજાબે 10.1 ઓવરમાં 1 વિકેટ ગુમાવીને 122 રન બનાવ્યા. ત્યાર બાદ મેદાનની ફ્લડલાઇટ બંધ કરી દેવામાં આવી અને દર્શકોને ઘરે મોકલી દેવામાં આવ્યા. યુદ્ધની સ્થિતિને કારણે, શહેરમાં બ્લેકઆઉટ લાદવામાં આવ્યું હતું અને મેચ રદ કરવામાં આવી હતી. આ લીગ સ્ટેજની 58મી મેચ હતી.