વિશ્વનો પ્રખ્યાત ફૂટબોલર લિયોનેલ મેસ્સી આજે ભારતની મુલાકાતે છે. આ દરમિયાન તેણે કોલકાતા ખાતે આયોજીત ‘GOAT India Tour 2025’ ઈવેન્ટમાં ભાગ લીધો હતો. આ સ્ટેડિયમમાં મેસ્સીને જોવા માટે હજારોની સંખ્યામાં લોકો ઉમટી પડ્યા હતા, પરંતુ અચાનાક હોબાળો મચી ગયો હતો. વિશ્વવિખ્યાત ફૂટબોલર મેસ્સી આજે કોલકાતા પહોંચ્યા હતા અને સોલ્ટ લેક સ્ટેડિયમની મુલાકાત લીધી હતી. તેમની સાથે ફૂટબોલર લુઈસ સુઆરેઝ અને રોડ્રિગો ડી પોલ પણ હતા. સન્માન સમારોહ અને લેપ ઓફ ઓનર પછી મેસ્સી માત્ર 10-20 મિનિટમાં જ સ્ટેડિયમમાંથી નીકળી ગયો હતો, જેનાથી હાજર હજારો ફેન્સમાં ગુસ્સો ફાટી નીકળ્યો હતો.મેસ્સીને જોવા માટે સ્ટેડિયમમાં હજારો ચાહકો એકઠા થયા હતા, જેમણે 4000થી 12,000 સુધીની મોંઘી ટિકિટો ખરીદી હતી. પરંતુ રાજકારણીઓ, મંત્રીઓ અને VIPથી ઘેરાયેલા મેસ્સીને દૂરથી પણ જોઈ શક્યા નહીં. આ બાદ, તે વહેલો નીકળી જવાથી ચાહકો ગુસ્સે થયા અને બોટલો, ખુરશીઓ ફેંકી, તોડફોડ કરીને બેરિકેડ તોડી નાખવાનો પ્રયાસ કર્યા હતો. ઘટના સ્થળના વીડિયો પણ સામે આવ્યા છે. આ હોબાળા બાદ, ઇવેન્ટના આયોજકો અને વહીવટ પર સવાલો ઉભા થયા છે.