ગ્લોબલ હોસ્પિટાલિટી ટેક્નોલોજી કંપની પ્રિઝમે (PRISM) (OYOની પેરેન્ટ કંપની) સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) સમક્ષ તેનું અપડેટેડ ડ્રાફ્ટ રેડ હેરિંગ પ્રોસ્પેક્ટસ-I (યુડીઆરએચપી-1) ફાઇલ કર્યું છે. પ્રસ્તાવિત આઈપીઓમાં રૂ. 6,650 કરોડ સુધીના શેરોના ફ્રેશ ઈશ્યૂનો સમાવેશ થાય છે અને તેમાં હાલના શેરધારકો દ્વારા કોઈ વેચાણ માટેની ઓફર રાખવામાં આવી નથી. કંપની રજિસ્ટ્રાર ઓફ કંપનીઝ સમક્ષ રેડ હેરિંગ પ્રોસ્પેક્ટસ (આરએચપી) ફાઇલ કરતા પહેલાં રૂ. 1,330 કરોડ સુધીનું પ્રી-આઈપીઓ પ્લેસમેન્ટ પણ લાવવાની વિચારણા કરી શકે છે. જો આવું પ્લેસમેન્ટ કરવામાં આવશે તો પ્રી-આઈપીઓ પ્લેસમેન્ટમાંથી મળેલી રકમ ફ્રેશ ઈશ્યૂની રકમમાંથી ઘટાડવામાં આવશે.
યુડીઆરએચપી-1 અનુસાર, કંપની પ્રાપ્ત થનારી કુલ રકમમાંથી રૂ. 4987.5 કરોડની રકમ વર્તમાન ઋણની ચુકવણી અથવા પૂર્વચુકવણી માટે ઉપયોગમાં લેવાનો પ્રસ્તાવ ધરાવે છે. બાકીની રકમ સામાન્ય કોર્પોરેટ હેતુઓ માટે ઉપયોગમાં લેવામાં આવશે. કંપનીના શેર એનએસઈ અને બીએસઈ પર લિસ્ટ કરવાની યોજના છે. આઈપીઓ સંપૂર્ણપણે ફ્રેશ ઈશ્યૂ તરીકે બનાવવામાં આવ્યો હોવાથી હાલના ટોચના શેરધારકો જેમ કે સોફ્ટબેંકની એસવીએફ ઈન્ડિયા હોલ્ડિંગ્સ, સ્થાપક રિતેશ અગ્રવાલ અને આરએ હોસ્પિટાલિટી હોલ્ડિંગ્સ, માઇક્રોસોફ્ટ, એરબીએનબી, ખઝાના, એ1 હોલ્ડિંગ્સ, સ્ટાર વર્ચ્યુ ઇન્વેસ્ટમેન્ટ, ગ્લોબલ આઇવી વેન્ચચર્સ, લાઇટસ્પીડ, ગ્રીનઑક્સ કેપિટલ અને Peak XV આ જાહેર ઈશ્યૂ મારફતે પોતાના શેર વેચી રહ્યા નથી.
ફાઇલ કરાયેલા પેપર્સમાં પ્રિઝમે પોતાને ટેક્નોલોજી આધારિત હોસ્પિટાલિટી પ્લેટફોર્મ તરીકે ગણાવ્યું છે, જે હોટેલ, વેકેશન હોમ, લાંબા ગાળાના નિવાસ માટેની પ્રોપર્ટી અને લિસ્ટિંગ્સ સહિતના ક્ષેત્રોમાં ગ્લોબલ મલ્ટી-બ્રાન્ડ પ્લેટફોર્મ તરીકે વિકસ્યું છે. પ્રિઝમનું “ઈન્ડિયા ફોર ધ વર્લ્ડ” મોડેલ વિવિધ બજારોમાં એકસરખી ટેક્નોલોજી અને ઓપરેટિંગ સિસ્ટમનો ઉપયોગ કરે છે, જ્યારે ગ્રાહકોના અનુભવ અને સપ્લાય ભાગીદારીને સ્થાનિક જરૂરિયાતો અનુસાર અનુકૂળ બનાવે છે.
દસ્તાવેજો દર્શાવે છે કે પ્રિઝમે મોટા પાયે વિસ્તરણ સાથે નફાકારકતામાં પણ નોંધપાત્ર સુધારો કર્યો છે. 31 ડિસેમ્બર, 2025ના રોજ પૂર્ણ થયેલા નવ મહિનાના ગાળા (9MFY26) દરમિયાન કંપનીએ કામગીરીમાંથી રૂ. 6,941 કરોડની આવક નોંધાવી હતી, જે નાણાંકીય વર્ષ 2025ની સમગ્ર વર્ષની રૂ. 6,259 કરોડની આવક કરતાં 11 ટકા વધુ હતી. પ્રિઝમે નાણાંકીય વર્ષ 2026ના નવ મહિનામાં રૂ. 748 કરોડનો ચોખ્ખો નફો નોંધાવ્યો હતો, જ્યારે નાણાંકીય વર્ષ 2025માં આ આંકડો રૂ. 245 કરોડ હતો.
નાણાંકીય વર્ષ 2026ના નવ મહિનામાં કંપનીની એબિટા રૂ. 2,127 કરોડ રહી હતી, જ્યારે નાણાંકીય વર્ષ 2025માં તે રૂ. 953 કરોડ હતી. નાણાંકીય વર્ષ 2026ના નવ મહિનામાં અસાધારણ બાબતો, શેર આધારિત ચૂકવણી ખર્ચ અને અન્ય આવકને બાદ કરતાં એબિટા રૂ. 1,968 કરોડ રહી હતી, જે નાણાંકીય વર્ષ 2025ના સમગ્ર વર્ષના રૂ. 1,095 કરોડના આંકડા કરતાં 80 ટકા વધુ છે અને તે પણ નવ મહિનાના આંકડાને વાર્ષિક ધોરણે ગણતરી કર્યા વિના.
કંપની 35થી વધુ દેશોમાં 43 બ્રાન્ડ્સનું સંચાલન કરે છે. 31 ડિસેમ્બર, 2025 સુધીમાં તેના નેટવર્કમાં 24,303 હોટેલ, 1,24,668 હોમ્સ અને 1,44,583 લિસ્ટિંગ્સનો સમાવેશ થતો હતો, જેમાં ભારતમાં 14,937 સ્ટોરફ્રન્ટ્સ સામેલ છે. 2012માં સ્થાપના પછીથી કંપનીએ 11.936 કરોડ અનન્ય ગ્રાહકોને સેવા આપી છે, જેમાંથી અંદાજે 68 ટકા માંગ સીધી ગ્રાહકો પાસેથી મળી છે. ભારતમાં પ્રિઝમ તેના કંપની-સર્વિસ્ડ હોટેલ વ્યવસાયનું વિસ્તરણ કરી રહી છે. આ એવી હોટેલો છે જ્યાં કંપની લીઝ અથવા મેનેજમેન્ટ સર્વિસ કરારો મારફતે વધુ કામગીરી સંભાળે છે, જેના કારણે તેને સેવા ધોરણો, બ્રાન્ડ અનુભવ અને ગ્રાહક સેવામાં વધુ નિયંત્રણ મળે છે. ભારતમાં કંપની-સર્વિસ્ડ હોટેલ સ્ટોરફ્રન્ટ્સની સંખ્યા 31 માર્ચ, 2025ના 1,053થી વધીને 31 ડિસેમ્બર, 2025 સુધીમાં 1,573 થઈ ગઈ હતી. નાણાંકીય વર્ષ 2026ના નવ મહિના દરમિયાન ભારતના કંપની-સર્વિસ્ડ હોટેલ્સની ગ્રોસ બુકિંગ વેલ્યુ (જીબીવી) રૂ. 1346.45 કરોડ રહી હતી, જે નાણાંકીય વર્ષ 2025ના સમગ્ર વર્ષના રૂ. 818.23 કરોડની સરખામણીએ લગભગ 65 ટકા વધુ છે. કંપની-સર્વિસ્ડ હોટેલ્સનો પ્રિઝમના ભારતના કુલ જીબીવીમાં 49.29 ટકાનો ફાળો રહ્યો હતો. કંપની Sunday, Palette, Clubhouse, Townhouse અને Townhouse Oak જેવી બ્રાન્ડ્સ હેઠળ આ મોડેલનું વિસ્તરણ કરી રહી છે.
પ્રિઝમનો અમેરિકન વ્યવસાય જી6 હોસ્પિટાલિટીના હસ્તાંતરણ બાદ વૃદ્ધિનું એક મુખ્ય કેન્દ્ર બની ગયો છે. જી6 હોસ્પિટાલિટી અમેરિકા અને કેનેડામાં Motel 6 અને Studio 6 બ્રાન્ડ્સનું સંચાલન કરે છે. નાણાંકીય વર્ષ 2026ના નવ મહિના દરમિયાન અમેરિકન વ્યવસાયની જીબીવી રૂ. 12,022.51 કરોડ રહી હતી. આ નાણાંકીય વર્ષ 2025ના સમગ્ર વર્ષના રૂ. 4,712.83 કરોડના અમેરિકન જીબીવી કરતાં લગભગ 155 ટકા વધુ છે. નવ મહિનાના ગાળા દરમિયાન પ્રિઝમના વૈશ્વિક જીબીવીમાં અમેરિકાનો ફાળો 52.39 ટકા રહ્યો હતો. જી6ના હસ્તાંતરણથી પ્રિઝમને ઉત્તર અમેરિકાના અર્થતંત્ર તથા લાંબા ગાળાના નિવાસ માટેની હોટેલ સેગમેન્ટમાં વધુ મજબૂત હાજરી મળી છે. સાથે જ Motel 6 અને Studio 6 બ્રાન્ડ્સ દ્વારા રોયલ્ટી અને ફ્રેન્ચાઇઝી આધારિત આવકનો એક નવો સ્ત્રોત પણ ઉમેરાયો છે.
પ્રિઝમે યુરોપમાં હોમ્સ અને લિસ્ટિંગ્સ વ્યવસાય દ્વારા પણ નોંધપાત્ર વિસ્તરણ કર્યું છે. 31 માર્ચ, 2025ના 2,08,901ની સરખામણીએ 31 ડિસેમ્બર, 2025 સુધીમાં યુરોપમાં કંપનીના હોમ્સ અને લિસ્ટિંગ્સની સંખ્યા વધીને 2,69,251 થઈ હતી. કંપનીના યુરોપિયન હોમ્સ અને લિસ્ટિંગ્સ વ્યવસાયમાં Belvilla, DanCenter અને CheckMyGuest જેવી બ્રાન્ડ્સનો સમાવેશ થાય છે. આટલા મોટા વિસ્તરણ છતાં દસ્તાવેજોમાં જણાવાયું છે કે પ્રિઝમે યુરોપના હોમ્સ માર્કેટમાં હજુ 1 ટકાથી પણ ઓછો હિસ્સો મેળવ્યો છે, જે આ વિશાળ અને વિખરાયેલા બજારમાં આગળના વિકાસ માટે નોંધપાત્ર તકો દર્શાવે છે.
પ્રિઝમે પોતાની એપ્સ, વેબસાઇટ્સ, કોર્પોરેટ ચેનલો, ટ્રાવેલ એજન્ટ ચેનલો, કોલ સેન્ટર્સ અને સીધા વૉક-ઇન ગ્રાહકો મારફતે મજબૂત ગ્રાહક નેટવર્ક ઊભું કર્યું છે. નાણાંકીય વર્ષ 2026ના નવ મહિના દરમિયાન 67.6 ટકા રોકાણો સીધા ગ્રાહક ચેનલો મારફતે પ્રાપ્ત થયા હતા. આ જ સમયગાળા દરમિયાન રીપીટ ડિમાન્ડ 61.8 ટકા રહી હતી. પ્રિઝમના લોયલ્ટી ઇકોસિસ્ટમમાં OYO Wizard અને My6 એપનો સમાવેશ થાય છે. 31 ડિસેમ્બર, 2025 સુધીમાં કંપની પાસે 1.907 કરોડ OYO Wizard મેમ્બર્સ અને 74 લાખ My6 મેમ્બર્સ હતા, જેના કારણે કુલ લોયલ્ટી મેમ્બર્સની સંખ્યા 2.64 કરોડ થઈ હતી. માત્ર ભારતમાં જ OYO Wizardના 1.67 કરોડ મેમ્બર્સ હતા, જેના કારણે તે ભારતમાં અગ્રણી ટ્રાવેલ બ્રાન્ડ્સ દ્વારા સંચાલિત લોયલ્ટી પ્રોગ્રામોમાં મેમ્બર્સની સંખ્યાના આધારે સૌથી મોટો પ્રોગ્રામ બની ગયો છે.
એસએન્ડપી ગ્લોબલ રેટિંગ્સે પ્રિઝમના ‘B’ ઇશ્યૂઅર ક્રેડિટ રેટિંગને યથાવત રાખતાં તેના આઉટલુકને ‘Stable’માંથી વધારીને ‘Positive’ કર્યું છે. એજન્સીએ નફાકારકતામાં સુધારો, મજબૂત રોકડ પ્રવાહ અને પ્રસ્તાવિત આઈપીઓથી બેલેન્સ શીટ પર થનારી સકારાત્મક અસરને તેના મુખ્ય કારણો તરીકે દર્શાવ્યાં છે. એજન્સીએ નોંધ્યું હતું કે નાણાંકીય વર્ષ 2024થી નાણાંકીય વર્ષ 2026 દરમિયાન કંપનીની એબિટામાં 45 ટકાથી વધુના ચક્રવૃદ્ધિ વાર્ષિક વૃદ્ધિ દર (સીએજીઆર) સાથે સતત સુધારો જોવા મળ્યો છે અને આગામી વર્ષોમાં કંપનીના માર્જિન લગભગ 30 ટકા સુધી પહોંચવાની અપેક્ષા છે. મોટા પાયે વિસ્તરણ, કામગીરીની કાર્યક્ષમતા અને પ્રીમિયમ સેવાઓ તરફના ઝોકના લીધે આ વૃદ્ધિ જોવા મળી છે.
4 જૂને આઈટીએટીની દિલ્હી બેન્ચે પ્રિઝમ સામેની રૂ. 3,885 કરોડની કર માંગને રદ કરી હતી. ટ્રિબ્યુનલે નિર્ણય આપ્યો હતો કે કંપનીએ તેની પેરેન્ટ કંપનીને જારી કરેલા ફરજિયાત રૂપાંતરિત થઈ શકતા પ્રેફરન્સ શેર પર પ્રાપ્ત થયેલા શેર પ્રીમિયમને એન્જલ ટેક્સની જોગવાઈ હેઠળ આવક તરીકે કરપાત્ર ગણાવી શકાય નહીં. ટ્રિબ્યુનલે નોંધ્યું હતું કે મૂલ્યાંકન આરબીઆઈ દ્વારા મંજૂરીપ્રાપ્ત મૂલ્યાંકનકારો દ્વારા યોગ્ય પદ્ધતિનો ઉપયોગ કરીને કરવામાં આવ્યું હતું અને કર વિભાગને નોંધાયેલા મૂલ્યાંકનકારોના મૂલ્યાંકનને નકારવાનો અધિકાર નથી. આ નિર્ણયથી આઈપીઓ પહેલાં પ્રિઝમ પર રહેલો એક મહત્વપૂર્ણ કાનૂની અને નાણાંકીય ભાર દૂર થયો છે તેમજ હવે રદ થઈ ચૂકેલી આ જોગવાઈ હેઠળ નિશાન બનેલી અન્ય સ્ટાર્ટઅપ કંપનીઓ માટે પણ આ ચુકાદો એક મહત્વપૂર્ણ આધાર બની શકે છે.