અમદાવાદમાં અકસ્માતની સંખ્યામાં સતત વધારો થઈ રહ્યો છે તેમાં પણ ખાસ કરીને અકસ્માતમાં સગીર વાહન ચલાવતો હોય તેવા કેટલાક કિસ્સા પ્રકાશમાં આવ્યા છે. જેથી અમદાવાદ ગ્રામ્ય DEO દ્વારા સ્કૂલોને પરિપત્ર કરીને જાણ કરવામાં આવી છે કે, સ્કૂલમાં આવતા બાળકો નિયમ વિરૂદ્ધ વાહન લઈને આવતા હોય તો તેમને અટકાવી દેવા. આગામી અઠવાડિયામાં DEO દ્વારા ટ્રાફિક પોલીસ અને RTO સાથે મળી ડ્રાઇવ યોજવામાં આવશે. જેમાં નિયમ વિરૂદ્ધ વાહન લઇને આવતા બાળકોના માતા-પિતા સામે કાર્યવાહી કરવામાં આવશે. અમદાવાદ ગ્રામ્ય DEO કૃપા ઝાએ જણાવ્યું હતું કે, એમવી એક્ટ મુજબ 125 સીસી કરતા વધુના વાહનો બાળકોને ચલાવવાની મંજૂરી નથી, છતાં વિદ્યાર્થીઓ વાહનો લઈને સ્કૂલે આવે છે. જેના કારણે બાળકો, વાલી અને સ્કૂલની સલામતી જોખમમાં મૂકાય છે, જેથી અમે પરિપત્ર કર્યો છે કે, જે પણ વિદ્યાર્થીઓ અનઅધિકૃત વાહનો લઈને આવે તો સ્કૂલના આચાર્યએ વાલીઓને અવગત કરવાના રહેશે. આગામી સમયમાં અમે RTO અને ટ્રાફિક પોલીસની મદદથી ડ્રાઇવ ચલાવીશું. સૂચના આપ્યા બાદ પણ કોઈ બાળક વાહન લઇને સ્કૂલે આવતો હશે તો તેની સામે કાર્યવાહી કરવામાં આવશે.DEO દ્વારા માત્ર સ્કૂલની બહાર જ નહિ પરંતુ સ્કૂલની અંદર પણ ડ્રાઇવ યોજવામાં આવશે. સ્કૂલના પાર્કિગમાં જે વાહનો હશે તેમાં બાળકોના વાહનો હશે તો સ્કૂલની અંદર જઈને તપાસ કરવામાં આવશે. બાળક વાહન ચલાવતા ના ઝડપાય પરંતુ સ્કૂલે વાહન લઈને આવ્યો હશે તે જાણ થાય તો તે અંગે પણ કાર્યવાહી કરવામાં આવશે. એક અઠવાડિયા સુધી સ્કૂલે તમામ બાળકો અને વાલીઓને આ અંગે જાણ કરવાની રહેશે. ત્યાર બાદ DEO દ્વારા અલગ અલગ સ્કૂલોમાં RTO અને પોલીસ સાથે મળીને સરપ્રાઇઝ ચેકીંગ કરવામાં આવશે.