ચેન્નાઈ : દેશના મહાન ચેસ પ્લેયર વિશ્વનાથન આનંદની રમત-ગમત ક્ષેત્રની વૈશ્વિક સંચાલન સંસ્થા ફિડેના ઉપાધ્યક્ષ પદે નિયુક્તિ કરવામાં આવી છે. જ્યારે વર્તમાન અધ્યક્ષ આર્કેડી વોર્કોવિચને બીજા કાર્યકાળ માટે ફરી અધ્યક્ષ તરીકે પસંદ કરવામાં આવ્યા છે. 5 વખતના વર્લ્ડ ચેમ્પિયન વિશ્વનાથન આનંદ વોર્કોવિચની ટીમના સદસ્ય હતા.  વોર્કોવિચને 157 મત મળ્યા જ્યારે તેમના વિરોધી આંદ્રેઈ બૈરિશપોલેટ્સના પક્ષમાં માત્ર 16 જ મત પડ્યા હતા. એક મત અમાન્ય રહ્યો જ્યારે 5 સદસ્યોએ મતદાનથી અંતર જાળવ્યું હતું.  ચેસની વૈશ્વિક સંસ્થાની ફિડે કોંગ્રેસ દરમિયાન આ ચૂંટણી થઈ હતી. 44મી ચેસ ઓલમ્પિયાડ દરમિયાન જ તેનું આયોજન કરવામાં આવ્યું હતું.  પોતાની કરિયર દરમિયાન અનેક મેડલ્સ અને સન્માન જીતનારા ચેન્નાઈના વિશ્વનાથને તાજેતરમાં સ્પર્ધાઓની સંખ્યા ઘટાડીને કોચિંગ પર ધ્યાન આપવાનું શરૂ કર્યું છે.