નવી દિલ્હી, 30 જુલાઈ, 2026 – ભારતના અગ્રણી ડિજિટલ ટેક્નોલોજી ફોરમનો એક દાયકો પૂર્ણ થવા પર, કેન્દ્રીય સંચાર અને ઉત્તર પૂર્વ ક્ષેત્ર વિકાસ મંત્રી શ્રી જ્યોતિરાદિત્ય સિંધિયાએ નવી દિલ્હીના યશોભૂમિ કન્વેન્શન સેન્ટર ખાતે 7 થી 10 ઓક્ટોબર, 2026 દરમિયાન યોજાનારી ઈન્ડિયા મોબાઈલ કોંગ્રેસ (IMC) 2026 ની 10મી આવૃત્તિ માટે સત્તાવાર થીમ “Scale Without Boundaries” નું અનાવરણ કર્યું.
વિશ્વભરના નીતિ નિર્માતાઓ, ઉદ્યોગપતિઓ, નવીનતાઓ (Innovators), સ્ટાર્ટઅપ્સ, રોકાણકારો અને શિક્ષણવિદોને છેલ્લા 10 વર્ષથી એક મંચ પર લાવવાની ઉજવણી કરતા, IMC 2026 એ વાતની ઝલક રજૂ કરે છે કે કેવી રીતે ભારતની ડિજિટલ ઇકોસિસ્ટમે વૈશ્વિક ડિજિટલ પરિવર્તનના આગલા તબક્કા માટે દિશા નિર્ધારિત કરીને છેલ્લા એક દાયકામાં પ્રગતિ કરી છે.
“Scale Without Boundaries” થીમનું મહત્વ
દસમી આવૃત્તિની થીમ “Scale Without Boundaries”, એવા ભવિષ્યની કલ્પના કરે છે જ્યાં નવીનતા કોઈપણ ભૌગોલિક, ઉદ્યોગ અથવા ટેક્નોલોજીની સીમાઓમાં બંધાયેલી ન હોય. તે એક એવી દુનિયાને પ્રતિબિંબિત કરે છે જ્યાં વિશ્વસનીય ડિજિટલ ઈન્ફ્રાસ્ટ્રક્ચર, આર્ટિફિશિયલ ઈન્ટેલિજન્સ, નેક્સ્ટ જનરેશન કનેક્ટિવિટી અને સીમા પારના જોડાણો દરેક જગ્યાએ પ્રભાવ પેદા કરવા માટે વિચારોના વિકાસને સરળ બનાવે છે. ટેક્નોલોજી કેવી રીતે રાષ્ટ્રને અણધાર્યા સ્તરે બદલી શકે છે તે દર્શાવીને, ભારત હવે વૈશ્વિક સ્તરે ઇન્ટરઓપરેબલ, સુરક્ષિત અને સર્વસમાવેશક ડિજિટલ ઇકોસિસ્ટમને આકાર આપવામાં મદદ કરી રહ્યું છે.
એશિયાનું સૌથી મોટું ડિજિટલ ટેક્નોલોજી ફોરમ
ભારત સરકારના સંચાર મંત્રાલયના ટેલિકોમ્યુનિકેશન વિભાગ (DoT) અને સેલ્યુલર ઓપરેટર્સ એસોસિએશન ઓફ ઇન્ડિયા (COAI) દ્વારા આયોજિત IMC ની ઐતિહાસિક 10મી આવૃત્તિમાં 1.5 લાખથી વધુ લોકો હાજરી આપે તેવી અપેક્ષા છે, જેમાં 100 થી વધુ દેશોના 300 થી વધુ પ્રદર્શકો અને ભાગીદારો સામેલ હશે અને 1,500 થી વધુ યુઝ કેસ (use cases) પ્રદર્શિત કરવામાં આવશે.
