મુંબઇ : છેલ્લા કેટલાય સમયથી ઇમરાન હાશ્મી સલમાન ખાનની આવનારી ફિલ્મ ટાઇગર થ્રીનો હિસ્સો હોવાની બોલીવૂડ તથા મીડિયામાં ચર્ચા છે. આ ફિલ્મમાં તે ખલનાયક તરીકે જોવા મળવાનો છે તેવી વાત થઇ રહી છે. જોકે ઇમરાન હાશ્મીએ હાલમાં આ ફિલ્મનો હિસ્સો હોવાની વાતને નકારી કાઢી હતી. ઇમરાન હાશ્મીએ હાલમાં આપેલા એક ઇન્ટરવ્યુમાં જણાવ્યું હતું કે, મેં કદી એવું કહ્યું નથી કે હું ટાઇગર થ્રીમા કામ કરી રહ્યો છું. હું દરેકને કહેવા માંગુ છું કે હું આ ફિલ્મનો હિસ્સો નથી. હા, જો આ ફિલ્મમાં હું કામ કરતો હોઇશ તો મારા પ્રશંસકો એ જાણીને ખુશ થશે. પરંતુ હાલ તો હું આ ફિલ્મનો હિસ્સો નથી. તેણે એમ પણ કહ્યું હતું કે હજુ પણ નથી જાણતો કે હું આ ફિલ્મનો હિસ્સો છું કે નહીં ? મને સત્તાવાર રીતે ફિલ્મનિર્માતાએ આ બાબતે જણાવ્યું નથી. હું પણ મીડિયાના સમાચાર કેટલાય સમયથી  સાંભળી અને વાંચી રહ્યો છું કે હું સલમાન ખાનની ટાઇગર થ્રીમાં વિલન તરીકે કામ કરી રહ્યો છું. તમે લોકો ટાઇગરને મળો તો જરૂર આ વાતની સ્પષ્ટતા કરી લેશો. ઉલ્લેખનીય છે કે, આ ફિલ્મના નિર્માતા કે પછી સલમાન ખાન તરફથી ઇમરાન હાશ્મી આ ફિલ્મનો હિસ્સો છે તેવી કોઇ સ્પષ્ટતા કરવામાં આવી નથી.