ગીરના જંગલ વિસ્તારમાંથી એક રોમાંચિત વીડિયો સામે આવ્યો છે. જેમાં જંગલનો રાજા સિંહ કાગડાને લાડ લડાવ્યાં બાદ તેનો શિકાર કરે છે. આ શિકાર સમયે વાતાવરણ કાગડાઓના કાવ કાવની ગુંજી ઉઠે છે. આ વીડિયોમાં એક સાથે ત્રણેક વનરાજ એકસાથે જોવા મળે છે. વાયરલ થયેલો આ વીડીયો ગીરના જંગલનો હોવાનું અનુમાન થઈ રહ્યુ છે.
વનરાજ આગળ કાગડાની ચતુરાઇ ન ચાલી
ગીર જંગલમાં સિંહ સહિતના તમામ પ્રાણીઓ શિકાર કરતા હોવાની ઘટના રોજીદી બનતી હોય છે, પરંતુ જ્યારે જંગલના રાજા સિંહ શિકાર કરતા હોય તેવા દ્રશ્યો કોઈ કેમેરામાં કેદ કરે તે જોવાનો અનેરો લ્હાવો હોય છે. હાલ સોશિયલ મીડિયામાં સિંહ શિકાર કરતો હોય એવો એક વીડિયો વાયરલ થયો છે. આ વીડિયો 52 સેકન્ડનો છે. જેમાં જંગલ વિસ્તારમાં પીવાના પાણીના કુંડ આસપાસ ત્રણેક સિંહો આરામ કરતા જોવા મળે છે. ત્યારે ત્યાં કાગડો પહોંચતા જ એક સિંહ તેના પંજા રાખી કાગડાને લાડ લડાવે છે. એ સમયે કાગડો ચતુરાઈ પૂર્વક ઉડવા પ્રયાસ કરે છે, ત્યારે બીજો સિંહ ત્યાં દોડી આવી કાગડાને પંજા નીચે દાબી દેવા પ્રયાસ કરે છે. જોકે, પહેલાંથી રમત કરી રહેલો સિંહ કાગડાનો શિકાર કરી મોઢામાં લઈ દુર ભાગી જાય છે. એ સમયે જ ત્યાં આકાશમાં અને ઝાડ પર રહેલા અન્ય કાગડાઓની કાવ કાવની ચિચિયારીઓથી ગુંજી ઉઠે છે. જોકે તેની કોઈ અસર સિંહને થતી નથી.
આવા દ્રશ્યો ભાગ્યે જ જોવા મળે છે
આમ, સિંહ પરીવારની કાગડા સાથે પહેલા રમત અને બાદમાં શિકાર કર્યાના રોચક દ્રશ્યો કોઈએ કેમેરામાં કેદ કરી લીધા હતા. જે વીડિયો સોશિયલ મીડિયામાં હાલ ખૂબ વાયરલ થઇ રહ્યો છે. જેને લોકો ઉત્સુકતાથી નિહાળી રહ્યા છે. આવા દ્રશ્યો ભાગ્યે જ જોવા મળે છે.
